Både oljevern og ubåtutgreiing til Fedje

? Det er hyggjeleg at dei følgjer opp det som tidlegare har vore avtala, seier Fedje-rådmann Vidar Bråthen. 29 millionar kroner til oljeverndepotet er i tråd med den summen som har vore antyda tidlegare. Bråthen meiner at 15 millionar kroner til utgreiing av heving av ubåtvraket også viser at dette vert ei grundig utgreiing.
? Har du tillit til at Kystverket vil sjå grundig på hevingsalternativet?
? Dei politiske føringane er klare, og eg kjenner meg trygg på at dette verkeleg vert følgd opp, seier Bråthen.

? Styrking av oljevernet
I praksis betyr dette ei betydeleg styrking av oljevernmateriellet på Fedje og etablering av ein øva mannskapsstyrke som kan betjena og mobilisera utstyret, heiter det i ei melding frå Fiskeri- og kystdepartementet. Dei nyttar og høvet til å minna om at det var Bondevik si andre regjering som vedtok å leggja ned hovuddepotet på Fedje.
- Det er ein betydeleg skipstrafikk i Nordhordland, både i form av tankskipstrafikk til Mongstad og Sture og i form av lokaltrafikk og ordinær kysttrafikk. Fedje ligg sentralt plassert i høve denne trafikken. Regjeringa vurderer det difor som viktig å styrkja oljevernberedskapen i området. Hovuddepotet for oljevernutstyr på Fedje skal vera på plass i løpet av 2007, heiter det i meldinga som ligg ute på departementet sin nettstad.

Utgreiing om heving
Regjeringa føreslår og ei løyving på ytterlegare 15 millionar kroner til utgreiing av metodar for å heva ubåtvraket ved Fedje. Dette kjem i tillegg til rundt 5 mill. kroner frå tidlegare løyving, slik at samla ramme for utgreiinga er 20 millionar kroner, går det fram av ei anna melding frå departementet.
- Arbeidet med å utgreia hevingsalternativet har høg prioritet. Det er viktig for meg å få alle forslag til hevingsmetodar på bordet. Dei framlegga til hevingsmetodar som har kome opp i ettertid skal få same grundige vurdering som det dei alt utgreidde alternativa har fått, uttalar fiskeri- og kystminister Helga Pedersen ifølgje meldinga.