Bamseklem for Sudan

Tysdag var heile Lindås barneskule snudd på hovudet og fylt med aktivitetar med mål om å samla inn pengar til ein fredslandsby i Sudan, eit prosjekt i regi av Strømmestiftelsen. Elevane fekk inn 28.685 kroner på Sudan-kvelden.

Fleire konsertar
Kreativiteten hadde inga grense og loppemarknad, kunstutstilling, foredrag og auksjon var berre noko av det elevane hadde laga til. For høvet var skulekjøkkenet omgjort til konsertarena og sirkus med klovnestrekar og eigenlaga dans. I eit rom like ved kunne ein nyta flotte tonar frå unge stjerner som song karaoke. Lars-Andrè Nesse (13) og Christian Krossøy (12) imponerte med si tolking av A-ha sin store hit «Take on me».
? Eg har ikkje planar om å verta noko songstjerne. Eg skal verta fotballproff, seier Lars-Andrè.
Førstepremien i karaokekonkurransen var ein stor sjokolade og diplom.
? Eg trur ikkje eg vinn. Eller kanskje, seier Christian.
Om dei vann eller ikkje, så var dei uansett med på å gje fem kroner kvar til fredslandsbyen i Sudan. I eit klasserom hadde tre jenter laga sin eigen miniskule.
? I Sudan har det vore krig i 20 år! Me kan hjelpa med å gje pengar til fredslandsbyen, seier Julie Hodneland Sæle.

Fattige
Saman med Heidi Dyrøy og Ina Mongstad Storsæter hadde ho laga til Sudansk skule på elevkvelden.
? Me har lært om Sudan på skulen, seier Heidi.
For tre kroner til inntekt for fredslandsbyen lærer jentene villig vekk språk og fortel om tilhøva i Sudan.
? Dei er fattige og treng pengar, seier Julie.
? Det er trist og forferdelig, men me kan hjelpa, avsluttar Ina.