Bergensarar i kø på visning

? Eit stort fleirtal av dei som kjem på visning på bustader i søre Lindås og Meland, kjem frå Bergen,stadfestar også eigedomsmeklar Magne Storheim.
Storheim seier dette er ei markant endring frå i fjor. Han meiner og at interessa frå folk i Bergen for å kjøpa bustad i Nordhordland, er større enn nokon gong tidlegare.
? Det er heilt vanleg at sju av ti på visning kjem frå sørsida av Nordhordlandsbrua, når me skal selja eit hus til dømes på Frekhaug.

Sør i regionen
Interessa frå bergensarane gjeld særleg bustader i Frekhaug-området, Knarvik og Alversund-området. Kjem ein lenger nord og aust, viser byfolka mindre interesse, og ein større del av dei på visning er lokale huskjøparar, fortel Storheim.
Det er og tydeleg at det særleg er folk frå Åsane og Sandviken-området som ser etter hus i Nordhordland, meiner eigedomsmeklaren. Folk frå andre deler av Bergen siktar seg truleg inn mot bustader i andre nabokommunar. Ei årsak til den auka interessa frå bergensarar til nabokommunane, er truleg at bustadmarknaden er endå meir oppheita i Bergen.
Men det er ikkje berre einebustader, fleirmannsbustader og leilegheiter bergensarane er ute etter. For eit par dagar sidan selde Storheim ein gard i Austrheim til ein person frå Fana.

Fire millionar
Større etterspørsel betyr vanlegvis høgare pris. Slik er det også i dette tilfellet. Prisen på einebustader i Noreg auka med 15,6 prosent frå september i fjor til september i år, viser statistikken frå eigedomsmeklarbransjen. Men prisen i pressområda har auka meir enn gjennomsnittet.
? Interessa i marknaden er større enn nokon sinne, meiner Storheim, som har arbeidd i bransjen i 18 år.
Det er god plassering og kvalitet på bustaden som sel, seier han. Ut frå marknaden ser det ut som at god plassering er i søre del av regionen, gjerne med god utsikt og nær sjøen.
? Eg hugsar det var stor ståhei første gongen me selde ein einebustad for over ein million kroner. No set me stadig nye prisrekordar, og nyleg selde me ein einebustad bygt midt på 70-talet for rundt 3,9 millionar kroner, seier Storheim.

Brueffekten
For eit år sidan meinte lokale meklarar at mesteparten av effekten av gratis bru var teken ut på førehand, når det gjeld prisauke på bustader i regionen.
? Det har no vist seg at prisane har auka meir enn eg trudde då, seier Storheim.
Andre årsaker til at bergensarar søkjer seg mot Nordhordland, meiner han er at mange ønskjer å få del i det oppvekstmiljøet og kvalitetane regionen kan tilby.
Også Magne Andre Nilsen i Notar har same inntrykket som Storheim når det gjeld auken i bustadprisane; større press i søre del av regionen og at det er fleire bergensarar på visning. Når det gjeld einebustader fortel Nilsen at dei har seld ein del einebustader i prisklassen mellom 2,5 og 3 millionar kroner. Prisrekorden deira på einebustader så langt er ein bustad på Holme som gjekk for 3,1 millionar kroner i førre veke.

Prisane opp
Tal frå Eiendomsmegler Vest, viser at snittprisane på einebustader dei har seld i Nordhordland har auka frå ein snittpris på vel 1.5 millionar kroner i 2005 til nær 1,76 millionar kroner så langt i år. Dette gjeld bustader over heile regionen, og prisane varierer sterkt etter kvar bustadene ligg og sjølvsagt etter kvaliteten. Men tala er ein klar indikasjon på at det er vesenteleg auke i prisane på einebustader i regionen frå i fjor til i år.

Snittpris einebustader    2005: 1.535.984, kr 11.931 per m2
Snittpris einebustader 2006: 1.761.389, kr 13.331 per m2