Bill Clinton på Fløksand

Bill Clinton så ut til å vera i godt humør då han spela golf på Fløksand i ettermiddag, tysdag. Før han sende ballen ut på bana, tok han nokre prøveslag og kom med kommentarar. Første slaget var ikkje heilt vellukka og gjekk ut på kanten av bana, men han tok seg inn att. Journalistar og andre tilskodarar fekk berre vera med på utslaget på hol ein. Då han og følgjet hans gav seg ut på bana i tre golfbilar, måtte tilskodarane stå att.

Hemmeleg
? Me fekk vita alt i går at Clinton skulle koma hit, men det var strengt hemmeleg, seier Iestyn Jones til Strilen.
Jones er tilsett på golfbana, og han fortel at dei hadde vanleg tilsyn på bana denne morgonen, ikkje noko ekstra.
? Bana var for våt til å gjera noko meir, seier han.
Jones tykte Clinton hadde bra sving på golfkølla, og at det viste at han hadde spela ein del golf før.
Ein mann i følgjet til Clinton seier til Strilen at Clinton prøver å få seg eit slag golf på reisene sine viss der er ei golfbane i nærleiken. Elles var han ikkje så snakkesalig og gav uttrykk for at media burde koma seg bort.
? Dette er eit privat besøk, og no har de fått bilda dykkar, sa han.

Overraskande
For dei som spelte golf på bana, kom det celebre besøket ganske overraskande, men det samla seg ein del tilskodarar då Clinton begynte å spela. Naturleg nok hadde det også samla seg ein god del pressefolk både frå aviser, radio og fjernsyn. Etter at Clinton og følgjet forsvann ut på bana, helt treninga på øvingsbana fram nesten som normalt.
Eks-presidenten sjølv var ikkje tilgjengeleg for spørsmål.
Bill Clinton kjem til Bergen for å halda føredrag i Grieghallen i kveld.