Billegare buss til Bergen

Fleirtalet i fylkesutvalet kjem i morgon til å gå inn for eit forslag om førti prosent reduksjon i prisen på periodekort for strekninga Nordhordland- Bergen.

Prisreduksjonen vil såleis retta seg mot dei pendlar til eller frå Bergen i samband med arbeid.

? I første omgang er dette eit prøveprosjekt som skal gå frå 1. januar 2006 til 1. juni 2006, seier Pål Kårbø, fylkespolitikar for KrF.

Prøveprosjektet startar samstundes med at det vert gratis å kjøra over Nordhordlandsbrua, og skal vera med på å motverka at alle som i dag tek bussen skiftar over til privatbil. Helst skal ein få fleire til å reisa kollektivt, slik at ikkje det vert kø av arbeidspendlarar på vegen til Bergen.

? Om dette prøveprosjektet går bra, vil det verta vidareført. Då kan det også verta aktuelt å innføra same tiltak også i andre område, seier Kårbø.

Askøybrua vert nedbetalt i 2006, og også der ventar ein auke i privatbilismen. Også i retning sør frå Bergen, mot Os, er det aktuelt med redusert pris på periodekort dersom dette slår an i Nordhordland.

I dag vert saka handsama i samferdselskomiteen, og der har KrF sin representant Grethe Lunde tidlegare snakka varmt for billegare buss. No er det klart at fleirtalskoalisjonen i fylket med KrF, Høgre og Frp vil gå inn for prosjektet både i komiteen i dag og i fylkesutvalet i morgon.