Brannbilane manglar GPS

? Det er nok eit spørsmål om pengar, men GPS eller kartplottar slik ambulansane har, hadde kome svært godt med denne gongen, seier vakthavande brannbefal Leif-Atle Træland.
Han må berre stadfesta at to brannbilar hamna på ville vegar på Mjåtveitflaten torsdag føremiddag. Etter det Strilen kunne sjå på vasstriper i vegen, var det snakk om to turar i feil retning før bilane koma fram mot huset det skulle vera brann i.
Det tok redaksjonen tre-fire minuttar før Strilen-bilen kunne leggja seg på hjul etter brannbilane. Likevel kunne Strilen sine reporterar spasera bort til huset der alarmen hadde gått samstundes med at brannbilane kom.

Smalt og vanskeleg
? Eg var på plass litt før brannbilane, men dei smale og svingete vegane i feltet gjorde det svært vanskeleg å orientera seg, seier Leif-Atle Træland. Han prøvde sjølv å dirigera sjåførane via telefon, men denne gongen glapp det litt med å finna fram. Dermed kan ein vera glad for at det var falsk alarm.
? Hadde det vore røykutvikling frå huset, ville det naturleg nok vore lettare for sjåførane å finna fram tidlegare, påpeikar Træland. Men han vedgår og at det kunne stått om liv dersom det var ein ulmebrann og ein eldre og hjelpelaus person i huset.

Saknar GPS
Det som skjedde på Frekhaug, aktualiserer uansett ønskjet om GPS eller ein kartplottar i brannbilane til Lindås og Meland brannvern.
? Det vert nok eit spørsmål om pengar, men kanskje denne episoden vil medverka til at me får slikt utstyr, seier Leif-Atle Træland.
Tilbake på kontoret gjekk han inn på «Gule sider» og fann raskt huset der alarmen hadde gått. Då alarmen gjekk, tok han seg ikkje tid til dette. Men med GPS eller tilsvarande utstyr taper ein ikkje tid på leiting. Då er det berre å følgja veganvisinga og køyra rett på huset.
Det vil gjelda alle hus i Nordhordland, etter kvart som vedtekne adresser kjem på plass der dette manglar.