Brosvik vil ha ressurs-team

? Ut frå erfaringane me har hatt med ulukka i Sløvåg, vil eg koma med framlegg om at det vert oppretta eit sentralt ressurs-team, som kan rykkja ut når alvorlege ulukker som den hos Vest Tank, oppstår, sa ordførar Trude Brosvik på folkemøtet på Dalsøya samfunnshus måndag.
Sjølv om det er kommunane som har det formelle ansvaret i slike saker, meinte Brosvik at eit statleg ressurs-team med fagfolk på ulike område, kunne hjelpa kommunane å gjera dei rette tinga.
? Her er det snakk om mange partar som skal samarbeida, og i små kommunar er det kanskje ikkje den ekspertisen som skal til, meinte Brosvik.
Ho viste til at det finst eit slik ressurs-team til dømes der det er flaum.

Vil granska
På møtet vart det også kjent at kommunal- og regionalminister Aaslaug Haga meiner det bør gjerast eit større gransking etter ulukka i Sløvåg for å finna ut kvifor det tok så lang tid før helsestyremaktene kom på bana og kunne gje folk svar på kvifor dei vart sjuke. Haga har skrive brev til Miljøverndepartementet om dette.
Brosvik gav si tilslutning til at ei slik gransking vert gjennomførd. Ho meiner det er viktig å trekkja lærdom av det som har skjedd i kjølvatnet av ulukka i Sløvåg.