Brukte elektrisk sag og stal utstoppa rev

Det var søndag føremiddag mellom klokka ni og ti at ein kjenning av politiet braut seg inn i bustadhuset på Haukeland i Masfjorden. Tjuven tok seg inn ved å knusa eit glas i kjellaren, og gjorde forsøk på å ta seg inn i førsteetasje derifrå. Då han fann døra frå kjellaren til etasjen over stengd, fann han ei elektrisk kjedesag på staden. Med den skar han hol i døra. Vel inne plukka vedkommande med seg ein utstoppa raudrev og eit pengeskap med ammunisjon. Revetjuven fekk ikkje vera på frifot særleg lenge. Søndag kveld vart han pågripen.
? Ein person er pågripen i ein stolen bil i Bergen. Bilen er stolen frå eit utleigebyrå for ei tid tilbake, seier politiførstebetjent Bernhard Krokås ved Masfjorden lensmannskontor.  
Huseigaren bur i Bergen og er mest i Masfjorden i helgane. Han var ikkje heime då innbrotet skjedde, men kom til staden i ellevetida søndag. Klokka ni var det observert ein ukjend leigebil ved huset.
? Det var mellom anna ei god skildring av bilen som gjorde at me kunne gjera ei pågriping, seier  Krokås.
Den pågripne er ein kjenning av politiet, som har god lokalkunnskap om Nordhordland, opplyser Krokås.