Bygdebyen Manger må veksa fortare!

? Skal Manger få ein Europris-butikk krevst det 7.000 innbyggjarar i kommunen. Det går ikkje med denne farten, var Oddbjørn Tveiten sitt klare råd til både ordførar og kommunen sine planleggjarar.
Etter gjeldande plan skal folketalet på sjølve Manger auka frå 930 i dag til kring 1.300 om tretti år. Men ein auke på berre 13-14 personar i året syntest både Tveiten og andre er eit altfor pinglete og svært så forsiktig mål.
? Ja, det er mogleg det talet bør aukast, sa Namtvedt, som noterte ned tips saman med plankonsulent Kjersti Flatråker.
Opp mot 30 personar møtte opp for å gje kommunen råd når kommunedelplanen no skal reviderast.

? Meir i høgda
? Me tek mot alle idear og innspel med takk, sa ordføraren i si innleiing. Sjølv var Namtvedt villig til å ta ein og annan sjanse for å utvikla «Bygdebyen Manger». Han såg det som betre å ha litt store vyer og heller falla litt tilbake enn ikkje å satsa.
? Eit tettare sentrum vil gje betre identitet. Då må me truleg vera villige til å byggja meir i høgda, sa Namtvedt blant anna.

? Meir bustader
Sjølv planlegg kommunen ny pumpestasjon for kloakk. Men etter dagens planar skjer det ikkje noko i marka før i 2010. Dagens anlegg kan gje overløp til Nesvatnet, opplyste Einar Færø ved teknisk etat.
Men det neste store bustadfeltet, på Selfallet, skal ha eige reinseanlegg og seinare koplast inn på det nye anlegget.
Dei fleste innspela kom innan bustadbygging.
? Manger har for lenge lagt etter utan byggjeklare kommunale tomter. Ta med meir bustaderal enn de har tenkt, sa Odd Matre. Han antyda bustadfelt på Nøttveit, sjølv om han og understreka at det er lett å koma med framlegg der andre eig.
? Det er mykje landbruksareal nær sentrum av Manger. Eg trur kommunen må vurdera å ta noko av det til bustader, sa Bjørg Skiftesvik. Ho sikta til områda nord og aust for kyrkja.
Ordføraren viste til at kommunen vil utvida feltet i Urhaugen, men det vert stoppa av Fylkesmannen inntil den nye kommunedelplanen er klar.
Fungerande rådmann Leif Taule viste til at Magnar Klausen jobbar med planar om bustader på eit sentrumsnært område. Det er tenkt høg utnyttingsgrad av arealet.