Byggevarehus på Ikenberget

Satsinga inneber eit fullsortiments byggevaresenter i Ikenberget næringsområde. Like ved riksvegen på Alverflaten kjem det 3500 m2 byggflate med byggevareforretning/-lager, proff-avdeling og eit salskontor for Blink-hus.
? Me har lenge hatt planar om å etablera oss med ny utsalsstad i tillegg til den me har i Bøvågen på Radøy, seier dagleg leiar i Stevnebø Trelast Stein Paulsen.
Stevnebø har ei 103 år lang historie i Bøvågen. Dei vil halda fram på Radøy også etter ei oppretting av ei avdeling på Ikenberget.

Sentralt
? Målet er å ha byggevaresenteret klart våren 2007. Me er svært glade for positive signal frå Lindås kommune si side til planane våre, seier dagleg leiar Stein Paulsen.
Byggjetida for byggevarebutikken vil vera på kring ti månader, og Paulsen trur dei kan vera klare på våren/sommaren 2007.
? Byggevaresenteret vil få ein sentral plass i regionen i åra som kjem, med tanke på den utbygginga ein ser i Meland, Knarvik og i Åsane.
Butikken i Bøvågen ligg for langt unna Knarvik-regionen når det gjeld gjer det sjølv-kundar og proffkundar. For hussal er det ikkje så avgjerande kvar kontoret ligg, men butikken på Ikenberget vil også selja hus.

Nye arbeidsplassar
? Me vil etter kvart også ha behov for nye medarbeidarar, seier Stein Paulsen.
Det kan verta tale om så mange som tjue nye tilsette for Radøy-verksemda.
? Stevnebø Trelast har hatt stor vekst dei seinare åra, og omsette i 2005 for 47.5 millionar kroner med 21 tilsette. Nærleik til marknaden, spesielt på sal til forbrukar og proff, samt ytterlegare satsing på hussal og prosjektutvikling vert stikkord for selskapet i åra som kjem, seier Paulsen.
Stevnebø Trelast sto for oppføring av kring 60 husvære i 2005. Verksemda er medeigar i selskapet NORDEK, som eig konsepta Byggkjøp og Blink-Hus.
? Byggkjøp vart i 2005 kåra til den best likte byggevarekjeda i Noreg. Blink-Hus er ein tradisjonsrik huskjede, med røter på Vestlandet.
På næringsområdet på Ikenberget har Stevnebø Trelast gjort avtale om kjøp av to tomter på i alt sju mål.