Byggjestopp på Ikenberget

? Ikenberget vel er godt nøgd og ser dette som ein førebels siger, seier Atle Gundersen i ein kommentar etter vedtaket torsdag.
I møtet kom først leiar Kjartan Nyhammer (Sp) med framlegg om å stoppa rammeløyvet som er gjeve til bygginga av eit Byggkjøp-anlegg, som Stevnebø Trelast skal driva. Bygningssjef Lars Johan Haukås meinte det ville vera eit betre alternativ å innføra eit dele- og byggjeforbod til ei betre vegløysing er på plass.
Slik det ligg an til no, vil blant anna Byggkjøp-anlegget få gjennomgåande tilkomst, blant anna forbi den private barnehagen og fleire bustadhus. Det er dette som er Ikenberget vel sitt hovudargument for å be politikarane stoppa byggjearbeida.
? Det var OK at det vart gjeve graveløyve til Byggkjøp-bygget, men ikkje eit administrativt rammeløyve som opna for den utbygginga og trafikkløysinga som er i gang, seier Nyhammer etter møtet.
Planutvalet vedtok med ni mot ei røyst (Nils Arne Træland,Høgre) at byggjearbeida skal stoppa og dessutan at det vert nedsett eit hurtigarbeidande utval for å finna ei betre vegløysing. Med i utvalet skal vera folk frå planutvalet, administrasjonen, velforeninga, grunneigar og Statens vegvesen.
? Føler du at utvalet har god nok juridisk ryggdekning for å stoppa byggjearbeida ein har fått rammeløyve til på Byggkjøp-tomta?
? Ja, ut frå fleire grunnar: Det er trafikkmessige omsyn og at trafikken har auka vesentleg sidan førre teljing på riksvegen gjennom Alvermarka, seier Kjartan Nyhammer. Han føler vidare at politikarane i 2002 vedtok plassering av ein barnehage som ikkje tok nok omsyn til trafikksikring.