Byggkjøp får halda ope

Fylkesmannen oppheva torsdag 28. juni kommunen sitt rammeløyve, og det var ei tid usikkert om Byggkjøp kunne opna som planlagt. Det gjekk likevel i orden utpå dagen fredag 29. juni. Vedtaket i dag inneber at aktiviteten i bygget kan halda fram.

Vegen stengt
Utvalet sette ein frist for arbeidsutvalet som arbeider med å finna ei løysing for vegane i området, slik at denne reguleringsplanen kan koma til behandling i utvalet 29. august.
Med knapt fleirtal, 6 mot 4, vedtok planutvalet også at vegen frå Alvertunet sitt bygg og nordover vert stengd, slik at det ikkje vert mogleg med gjennomkjøring. Dette var i tråd med krav frå Alvermarka Vel, noko også politikarane argumenterte med. Vedtaket vart gjort med hjelp av KrF, Ap, V og Sp sine røyster.

- Ei dårleg løysing
Prosjektleiar for dei som eig bygget, Alvertunet AS, Atle D. Utkilen, er svært skuffa etter dette vedtaket.
? Politikarane kunne i alle fall ha kome opp til Ikenberget og sjå korleis trafikken fungerer no. Dei gjer faktisk ikkje leksa si, seier Utkilen.
Han har påpeika overfor Strilen at dei som til dømes handlar maling hjå Frank Georg Fosse og skal vidare til Byggkjøp, no kan kjøra rett over tomten. Vert vegen stengt må dei kjøra tilbake over fartshumpane forbi bustadene nedanfor Dekkhuset, ut ved KIWI til riksvegen og inn att ved søre innkjøringa til Ikenberget. Dette genererer langt meir trafikk og er dermed meir trafikkfarleg enn dersom vegen var open, meiner Utkilen.