Cincinnati-guide med røter på Leiknes

– Eg syng ikkje i kor, men eg er aktiv i Sons of Norway her i Cincinnati. Difor melde eg meg som frivillig til dette arrangementet, og då ville eg sjølvsagt helst vera guide for nokon som kjem frå Noreg, seier Jean Crocker- Lakness til Strilens utsende, som har vore på kor-ferie i USA.
Og når ho attpåtil har strilerøter, er ho sjølvsagt verd eit oppslag i Strilen.
Cincinnatti er ein ganske stor by som ligg sør i delstaten Ohio, på grensa til Kentucky. I juli var byen vertskap for verdas største korarrangement, World Choir Games, med over 16.000 deltakarar frå over 60 land.

På besøk
– Det bur ikkje så veldig mange norskætta her i Cincinnati, men me har ei aktiv avdeling av Sons of Norway her, fortel Jean, som er med i styret der.
Ho er utdanna innan ernæring, og til dagleg jobbar ho med kosthaldet til folk på eldreinstitusjonane i byen. Mannen, som ikkje har norske røter, er professor.
– Far min var veldig interessert i slektshistorie, og eg trur det var i 1963 me var på besøk i Noreg. Då var me og på den garden der bestefaren min kom frå, på Leiknes i Lindås. Så vidt eg veit er garden framleis i slekta, seier Jean, som må snakka engelsk, for norsk kan ho ikkje.
– Det var hyggelig å treffe deg, er det einaste norske ho kan.

I 1903
Bestefaren heitte Johan Andreasson Leiknes og kom til USA i 1903, 19 år gammal. Også tvillingbroren Rasmus reiste til Amerika.
I Amerika forandra Johan førenamnet sitt til John og etternamnet til Lakness.
I USA fekk bestefaren utdanning og jobba seinare i eit stort telefonselskap. Han busette seg til slutt i Salt Lake City, i delstaten Utah. Bestefaren gifte seg med ei jente som hadde utvandra frå Hjelle i Sunnfjord.
Faren til Jean var elektroingeniør. Det var han som flytte til Cincinatti.

Julefest
Jean tykkjer det er kjekt å møta folk frå Noreg. Ho fortel at kvar jul arrangerer Sons of Norway julefest i Cincinnati, eller julfest som ho seier.
– Då kler me oss i norske klede, strikkejakker og bunader, og et norsk mat, fortel ho.
Jean og mannen har to søner.
– Men sønene våre er ikkje så interesserte i det norske, vedgår ho.
Men uansett tykkjer ho det ville vera stas å få eit oppslag om seg i Strilen.