Daglegstove for Lindås

Det klør i pianofingrane til Astrid Byrknes. Ho har vore prosjektkoordinator under oppussinga av gamle Knarvik sjukeheim, og har sett lokalet til senior- og aktivitetssenteret ta form. No er det berre ein liten månad att til opninga, og då skal pianoet i bruk. Senteret vert eit ope tilbod for eldre og funksjonshemma frå heile Lindås kommune.
? Her vert det pianospel og syng med oss, seier Astrid Byrknes, dagleg leiar ved senior- og aktivitetssenteret.
Etter at den gamle delen av Knarvik sjukeheim no er ferdig oppussa har seniorsenteret fått eit flott lokale med både peiskrok, langbord og kafé. Her kan seniorar og funksjonshemma i kommunen får koma kvar vekedag, anten dei no vil kjøpa ein rimeleg middag, vera med på ulike aktivitetar eller berre prata litt med gamle kjente.

Aktivitet kvar dag
? Her vert det ope frå 10.00 til 15.00. Kvar dag klokka 12.00 vert det ein eller annan aktivitet, seier Astrid Byrknes.
Programmet er klart for dei to første månadene i 2006. Annakvar fredag stiller Johannes Rydland og Otto Aksnes, like ofte vert det «Syng med oss». Frå programmet elles kan det nemnast både bingo, ulike foredrag og datakurs.

Ope for alle
Medan kommunen tidlegare berre har hatt eit dagtilbod til dei eldre, der det vart gjeve plass etter søknad, vil det nye seniorsenteret vera ope for alle. Her kan ein koma så ofte ein vil, og om ein ikkje vil vera med på aktivitetane kan ein berre prata eller lesa litt i aviser.
? Berre det å få prata saman er viktig, seier Rannveig Reigstad, ein av mange frivillige som har vore med i arbeidsgruppa som har utgreidd det nye tilbodet.
Dei frivillige frå ulike organisasjonar er ei viktig brikke for å til denne aktiviteten, som Lindås kommune har sett av to årsverk til å driva. I tillegg til senteret i Knarvik, som skal opna 11. januar, vonar Astrid Byrknes at dei også kjem i gang på Ostereidet same månad. Etter kvart skal ein også få til eit tilbod på Lindås, slik at det vert eit dagtilbod for eldre og funksjonshemma tre stader i kommunen. I tillegg til dei tilsette vil frivillige også gjera ein stor innsats.

Frisør og fotpleie
Dagleg leiar ved senior- og aktivitetssenteret i Knarvik, Astrid Byrknes, fortel at det har berre har vore positive svar frå dei frivillige. Det som vert spanande no er å sjå kor mange som kjem for å nytta tilbodet.
? Me vonar at dei som har ærend i Knarvik stikk innom, og kanskje kan dei gå saman og køyra fleire i lag, seier Astrid Byrknes.
Når ein likevel er innom seniorsenteret vert det også mogleg å ordna seg på håret eller få stelt føtene. Det er laga til eit eige rom tvers over gangen for seniorsenteret, der det vert tilbod om fotpleie tre dagar i veka.
? Kor ofte frisøren kjem til å vera her er ikkje sikkert, men det er tale om ein til to dagar kvar veke, seier Byrknes.
? Det at me her etablerer ein møteplass, kan også verka førebyggjande, seier aktivitør ved seniorsenteret Aud Furdal.
? Her kan ein få både sosialt samvær og oppleva ulike kulturinnslag.
Det vert også fysisk aktivitet, fysioterapeut Reidun Sæbdal skal stå for timane med «Trim og trall».
? Men tilbodet her handlar ikkje berre om å aktivisera dei eldre. Her kan dei koma saman og aktivisera seg sjølve, seier Reidun Sæbdal.Ut på våren vil det nyetablerte senioruniversitetet i Nordhordland også leggja nokre førelesningar hit. Og også før dette vert det ulike foredrag i seniorsenteret, både Gaute Gunleiksrud og Asbjørn Åsgaard er på talarlista