Dankar ut juletorsken

Familien Øksnes har vanlegvis lutefisk av torsk 2. juledag, men ikkje i år.

– Du veit når me først får slik «eksotisk» fisk så må me gjera noko bra utav det, seier Marit.

Måndag morgon fekk ho og mannen ein steinbit på 14,9 kilo på garn utanfor Baløy i Austrheim.

Må passa hender og føter
– Det var jo litt av ein fisk å få, men eg har fått steinbit før og veit å passa hender og føter for han. Dei kjevane knuser kva som helst som kjem imellom, seier Geir Henning Øksnes.

Han var åleine i båten då han oppdaga ruggen i garnet.
– Eg har alltid kveiteklepp med meg om bord, nettopp for slike tilfelle, så den brukte eg før eg rulla fisken oppi båten ved hjelp av garnet, seier han.

– Heilt skjelven
– Eg fekk litt av eit sjokk då han kom inn med den fisken. Eg vart heilt skjelven, seier Marit.

Det var ho som sette garnet medan Geir Henning styrte båten dagen før kjempefangsten. Ho deler gjerne taktikken med andre som måtte ønskja storfisk.

– Garnet må ikkje setjast for nært fjøresteinane, men heller ikkje så djupt. Rundt 8-10 meter djupne er bra, røpar Marit Geir Henning fekk jobben med å sløya og filetera.

Det vart godt og vel 10 kilo filet av den 109 centimeter lange fisken. Berre hovudet vog meir enn 2 kilo.

– Steinbiten er for stor til å steikja slik den er, så den skjer me i tynne skiver som me skal steika i ein saus med rømme, reker og kvitvin. Då vert han god til 2. dags middag, seier Geir Henning.