Dansk familie på Fedje melder trakassering

Situasjonen er no så ille at kona i familien er sjukemeld frå jobben sin på Fedje, og bur for tida med mannen som studerer ein annan stad på Vestlandet.
? I byrjinga oppfatta me det som rampestrekar, men etter tjuveri av postkasse og brev og øydelegging og tjuveri av hagelampar, er grensa nådd, seier mannen i familien.
Dei har no meld saka til politiet og teke ho opp med leiinga i kommunen.
Han seier dei ikkje har hatt nokon problem på Fedje tidlegare, men at trakasseringa starta i oktober i år. I tillegg til hærverk og tjuveri, opplever dei at folk ringjer på døra og deretter spring derifrå seint på kvelden og om natta. Dei har observert fire-fem ungdommar med hettegenser i samband med dette - folk dei ikkje kjenner.
Trass i at det er fleire postkassar ved postkassestativet deira, er det berre deira postkasse som har vorte øydelagt.
? Dersom det ikkje vert gjort noko med dette, ser me oss nøydd til å selja huset og forlata øya, seier mannen. Det synest han i så fall er veldig synd, då dei føler at dei har vorte godt mottekne på Fedje og har likt seg godt fram til oktober.
Rådmann Vidar Bråthen seier til Strilen at han har snakka med familien, og lovar å ta tak i dette.
? Me kjem mellom anna til å ta saka opp med skulen, seier Bråthen.