David kapra scenen

Kundane i Knarvik Senter hadde mykje å gleda seg over i helga. Fredag var det duka for finale i talentkonkurransen «Scenen er din».
I alt ni unge håpefulle var kvalifisert til finalen. Tilslutt var det David Hoen Tjore som drog det lengste strået. Tiåringen frå Radøy song og spelte ein versjon av songen «Summertime» og vann både gåvekort, heider og ære.

Overraska seg sjølv
? Det er veldig kjekt, seier Hoen Tjore. Han fortel at han melde seg på konkurransen fordi han hadde lyst å opptre for publikum.
 ? Eg har aldri spelt for så mykje publikum før. Det var sikkert dobbelt så mykje publikum som i dei innleiande rundane. Det var veldig spennande, seier han og fortel at fleire av kameratane hans var med for å heia.
 ? Kameratane mine sa at dei trudde at eg kom til å vinna, men det trudde ikkje eg. Dei andre deltakarane var veldig flinke. Eg trudde ikkje ein gong at eg skulle kvalifisera meg til finalen, seier Hoen Tjore forsiktig og fortel at han hadde håpa på ein femte- eller sjetteplass. Difor vart han svært overraska over at han vart utropt til vinnar.

Glad i musikk
Den unge musikanten valde sjølv ut songen han ville spela.
? Eg synest «Summertime» er kjempefin. Det er ein av favorittsongane mine, seier han og fortel at han er glad i både song og musikk. På fritida spelar han mellom anna kornett i Sæbø skulekorps. I tillgg får han også undervisning av Erlend Aagaard Nilsen
 -Eg likar å spela. Det er veldig kjekt, seier han og fortel at han har lyst til å halda fram med å spela i mange år.