Dekkrefusjon også for Nordhordland

Alt i dag utgjer piggfrie dekk over sytti prosent av bilane i Bergen. No vil bergenspolitikarane ha vekk flest mogleg av dei resterande piggdekka, og frå 1. november vil det difor vera dyrt å reisa til bydn med piggane ute.
Dei som likevel vel å ha piggar under dekka må grava i lommeboka og betala for piggkjøringa. For personbilar (opp til 3,5 tonn) vil det kosta 30 kroner for eit dagsoblat, 400 kroner for eit månadsoblat og 1.200 kroner for eit sesongoblat. For bilar over 3,5 tonn er satsane dobbelt så høge.

800 kroner i pant
Men for dei som kjører pigg i dag og vurderer å gå over på mjukare dekk, lokkar Bergen kommune med 800 kroner i pant. Panten er på 200 kroner for kvart dekk, maksimalt 800 kroner for ein bil, og må ordnast i samband med at ein kjøper piggfrie dekk til bilen.
Ordninga er i utgangspunktet retta mot dei som bur i Bergen, men gjeld også for dei som bur i dei omkringliggjande kommunane. Kravet her er då at ein har registrert fast arbeidsgjevar og arbeidsstad i Bergen. I prinsippet skal ein også ha bustadadresse i ein kommune som grensar til Bergen, men hjå Bergen kommune får Strilen opplyst at det nok også er håp for dei bur på Radøy eller i Austrheim.
? Me må sjå akkurat den regelen i lys av kva som er formålet av ordninga, nemleg å verta kvitt piggdekka i Bergen, seier Svein Bollingberg, prosjektkoordinator for innføring av piggdekkgebyr i Bergen.
Han viser til at då ordninga vart innført i Trondheim, hadde dei tilsvarande reglar der. Men også dei som hadde ein kommune mellom seg og Trondheim fekk utbetalt refusjon når dei la om frå pigg til piggfritt.
? Me vil ta sak for sak når dette kjem opp, seier Bollingberg.
Dei som vil ha pant for piggdekka sine må kjøpa piggfritt i perioden 27. september til 31. desember 2006. Og dei piggdekka ein får pant for kan ikkje brukast på andre bilar, men må leverast som avfall.

Småbilane syndar
Bollingberg opplyser at innan gruppa for tunge kjøretøy, bussar og drosjar er det kring nitti prosent som køyrer piggfritt. Når det totale talet likevel er nede i 72 prosent viser dette at småbilane er den store syndaren på pigga dekk.
Bakgrunnen for vedtaket i bystyret er at køyring med piggdekk kvar vinter er med på å gje Bergen dårleg og helseskadeleg luft.
Ordninga vil gjelda for dei aller fleste, med unntak for utrykkingskjøretøy, politiet, dei som har parkeringsbevis for rørslehemma og kjøretøy som er utstyrt for og som driv med salting, strøing eller brøyting.

Skrapeoblat
Så langt er det ikkje heilt avgjort kvar dei som vil ha oblat kan kjøpa desse. Det er planar om å setja opp automatar der ein kan kjøpa ein «pigglapp», Bergen kommune arbeider med å få avtalar med bensinstasjonar, og det kan henda at gebyret kan betalast via SMS.
For dei som berre skal betala gebyr nokre få dagar i løpet i av vinteren anbefalar Svein Bollingberg «skrapeoblat».
? Dette er ei ordning dei har hatt stor suksess med i Oslo. Då kan ein ha fem slike oblat liggjande i hanskerommet, og når ein så vil eit ærend til Bergen er det berre å finna fram eit oblat. Då skrapar ein oblatet slik at rett månad og dato kjem fram, og legg det på dashbordet, forklarar Svein Bollingberg.
Informasjon om gebyret og skjema for refusjon ved innlevering av piggdekk er tilgjengeleg på Internett. Sjå Bergen kommune sine nettsider på adressa www.bergen.kommune.no/piggfritt/.