– Den går ikkje, herr Fylkesmann!

«Meland kommune avviser Fylkesmannen i Hordaland sin konklusjon, og meiner den ikkje kan bli ståande».

Det er ordlyden i eit brev datert 21. november og underteikna Rolf Hansen (Ap), Solbjørg Åmdal Sandvik (Sp), Sigmund Larsen (Frp), Marit Jøssang (KrF), Åshild Aamli (Samarbeidslista), varaordførar Lars Barstad (V) og ordførar Nils Martin Aadland (H).

Dermed er det klart at heile formannskapet frontar den protesten som ordføraren har signalisert tidlegare: «Me kjem aldri til å godta dette».

«Dette» er kort og godt Fylkesmannen si oppheving av budsjetta til Meland og 13 andre kommunar for 2010 og 2011. Opphevinga er grunngjeven med ulovleg føring av ekstraordinært utbytte frå BKK.

Utbyttet er brukt som driftsinntekt, medan Kommunaldepartementet sine juristar har fastslått at det er feil. Ekstrautbyttet skal gå til investeringar, noko som har skapt store problem blant anna for Meland.

Som før omtalt har Meland hatt totalt 7,6 millionar i ekstrautbytte frå BKK. Dei er nytta til å medverka til overskot i drifta, som i sin tur er nytta til å dekka oppsamla underskot. Og den oppskrifta er «gjort i tråd med klare føringar frå fylkesmannen».

Meland formannskapet dokumenterer dette med å sitera fylkesmannen sine eigne ord: «Kommunen må nytta desse midlane til inndekning av underskot i år og neste år».
I protestbrevet vert det vist til at Meland har stolt på Fylkesmannen sin kompetanse til å gje råd i økonomiske saker.

«Når Meland kommune mottar skriftlege føringar frå fylkesmannen og etterlever dei, er det urimeleg at kommunen nokre år seinare skal bli «straffa» for å ha følgd dei same føringane», heiter det i brevet.

Der vert det og signalisert at Meland er villig til å ta saka til retten. Formannskapet «har grunn til å tru at Fylkesmannen i Hordaland sine føringar til Meland kommune i brev av 16.12.2009 står seg juridisk».

Brevet vert avslutta med at ein ber om at vedtaket om å underkjenna budsjetta vert oppheva.