Dødsulukke i Hjelmåstunnelen

Karsten Stall Osmundsen (36) busett på Ostereidet miste livet i trafikkulukka tysdag, opplyser Nordhordland lensmannsdistrikt.

Osmundsen var åleine i bilen, og skal ha vore på veg i retning Knarvik.

Politiet fekk melding om ulukka klokka 06.20 tysdag.

– To bilar med i alt tre personar var involvert i ulukka. Ulukka skjedde inne i Hjelmåstunnelen på E39. Bilane kom i kvar sin retning og frontkolliderte, seier lensmann Einar Vatne til Strilen.

Osmundsen sin bil vart treft av bilen som kom i mot.

– Undersøkingar viser at det var bilen med to personar i, som kom over i feil kjørefelt. Det er tatt blodprøve av dei involverte, og det er mistanke om at føraren av bilen som kom over i feil kjørefelt var rusa, opplyser Vatne.

Etter ulukka vart vegen stengt og trafikken dirigert via «gamlevegen».

– Vegen var stengt i to-tre timar medan det vart gjort undersøkingar og rydda på ulukkesstaden, seier Vatne.

Dødsulukka tysdag er den andre ulukka på vel ein månad på denne strekninga. Natt til nyttårsaftan omkom ein person i ei ulukke nokre hundre meter lenger aust, også i den ulukka var det mistanke om at det var rus involvert.

Tysdag kveld var det minnestund på ulukkesplassen.