Draumen har vorte verkeleg

– Her er leilegheita mi. Der er badet og vaskemaskina og her er kjøkkenet, stova og soverommet, seier Yvonne og guidar Strilen sin utsendte frå rom til rom.
– Me har handla masse. Koppar og slikt.
– Og lilla gardiner.
Yvonne og veninna Betsy smiler breitt og med god grunn. Dei er no eigar av kvar sin splitter ny leilegheit sentralt på Frekhaug.
Midt mellom Frekhaug senter og Sagstad skule har eit stort nybygg gradvis tatt form. No er det kome både hagemøblar på terrassane og blomar og gardiner i vindauga. Og med det er også ein stor draum vorte verkeleg for seks ungdommar og foreldra deira.
– Dei fleste unge tek det som sjølvsagt at dei ein dag skal få flytta for seg sjølv, ha sin eigen leilegheit eller byggja seg eit hus og stifta familie. Slik er det ikkje for Yvonne og venene hennar. At dei kan stå her i dag med eigen bustad og jobb er berre heilt fantastisk, seier Merethe Vikebø.
Ho er mor til Yvonne og blant foreldra som har tatt initiativ til eit privat bufellesskap i Meland.
– Ideen oppstod for fem år sidan. Me har alltid ønskt at Yvonne skal få vera så sjølvstendig som muleg og lenge hatt ein tanke om at me burde prøva å skaffa henne ein eigen bustad. Me prata om det med andre foreldre som også hadde ungdommar med forskjellige behov og kom fram til at me var mange nok til at me kunne prøva å få til noko saman, seier ho.

Heile historia finn du i Strilen si papiravis laurdag.