Duo i godt sig

Nitrobeat, alias Ivan Takle, fortel at han og kompanjongen Haakon B S Bjørklid, føler at det har begynt å losna litt i seinare tid.

Lokale sponsorar har i større grad oppdaga gutane og elektronikamusikken dei serverer, så dei har fått på plass ein del nytt og betre utstyr.

Berre for nokre dagar sidan fekk dei nye høgtalarar og monitor ved hjelp av pengestøtte frå Lindås kommune og Norsk Musikkråd.

– Det at me får meir lokal støtte gjev oss sjølvsagt ein boost i det me held på med, seier Takle.

I Bergen

Fredag for halvtanna veke sidan var duoen på Festplassen i Bergen og spelte musikken sin.

Då var rundt eit par hundre personar innom.

Kanskje ikkje eit veldig stort tal, men Nitrobeat & Haawk fekk berre eit par dagar på førehand til å reklamera for arrangementet, sidan det tok litt tid å få avtale med Bergen kommune. Dei er uansett fornøgde.

– Eg ser ein del mulegheiter for å få opptre med musikken vår i tida framover.

Det lokale miljøet har oppdaga oss stadig meir, og det er viktig, seier Ivan Takle.

Først var han berre Nitrobeat, men i februar i år vart han ein duo saman med Haawk som er stebror til kjærasten hans.

Haakon må seiast å vera mest frå Askøy, medan Takle bur i Alversund, for dei som ikkje skulle vita.

Godt møte

– At me to kom saman, er noko av det beste som har hendt meg. Han er veldig dyktig, og me har sånn omtrent den same musikksmaken. Han likar litt meir teknisk elektronika, men me utfyller kvarandre godt.

Ivan Takle seier at den siste og andre singelen frå duoen var klar først i juni, medan dei kom med sin aller første i mars.

For oss andre er det berre å låna øyra til kva dei to 19-åringane har å by på.

Dei får mykje skryt, og ambisjonane deira er det ingenting å seia på. Dei håpar på eit internasjonalt gjennombrot.