Dyr drenering på Fossemyra

Idrettsanlegget til Kvernbit idrettslag var dekka av vatn to gonger hausten 2005. I samband med at det kom mykje regn klarte ikkje dreneringsanlegget å ta unna for vatnet som kom frå liene rundt banene. Det hopa seg særleg opp ved underløpet under fylkesvegen, slik at dreneringa stoppa opp inne ved banene.

Synfaring

Torsdag denne veka var representantar for kommunen, idrettslaget, Meland Aktiv og fleire grunneigarar på plass for å sjå på kva som kan gjerast for å hindra fleire slike flaumar.

Under synfaringa på Fossemyra vart det mellom anna peika på at dreneringa under vegen og vidare ikkje er tilstrekkeleg slik anlegget er i dag.

Etter kvart som det har vorte mindre og mindre myr på Fossemyra, er det tilsvarande mindre magasin for å samla opp regnvatnet. Tidlegare kunne myra ta opp i seg tusenvis av liter, vatn som så gradvis rann over i bekkar og rør. I dag er det kunstgrasbane, grusbane, idrettshall og parkering på arealet, og vatnet som renn ned frå liene ikring må ha plass i dreneringssystemet.

Kommunalsjef i Meland Jens Bjordal ynskjer ikkje å seia for mykje om kva som må gjerast, då dette ikkje er planlagt enno. Men det som heilt sikkert må gjerast er å leggja eit nytt dreneringsrør frå grusbana på Fossemyra, under vegen og inn på jordet på andre sida.

Inkludert graving har eit slikt dreneringsrør ein meterpris på kring 3000 kroner. Med om lag 50 meter grøft vert prisen på grøfta aleine 150.000 kroner.

Kommunalsjefen presiserer at dette berre er førebelse anslag, då det ikkje er gjort oppmåling eller nærare berekningar.

Borehol

Under synfaringar vart det av fleire deltakarar peika på at vatnet ikkje har tilstrekkeleg fall, sjølv om ein får det over vegen og inn på jordet til næraste nabo. Det eksisterande dreneringsrøret som ligg der har ikkje ledig kapasitet. Fleire meinte at einaste løysing er å føra vatnet først i rør under vegen og inn på jordet, og så vidare inn i eitt eller to borehol for å få vatnet inn i Mjåtveitvassdraget.

Vestnorsk Brunnboring kan ta ein slik jobb med å bora hol gjennom den knausen som er i vegen. Dagleg leiar i Vestnorsk Brunnboring A/S Helge Sæterstøl opplyser til Strilen at dersom holet skal ha ei lengde på 130 meter, vil dei kunna bora opp til 360 millimeter i diameter. Prisen for boringa vil vera i storleik 2.500 kroner for meteren. Med denne meterprisen vert det 325.000 kroner for 130 meter.

Sæterstøl presiserer at meterprisen på 2.500 kroner er eit anslag.

Kommunalsjef i Meland Jens Bjordal seier at kommunen tidlegast i neste veke har klart eit forslag om kva som må gjerast for å betra dreneringa av vatnet frå Fossemyra.