Dyrefjøs forsøkt påsett

? Me ser på dette som ei stygg sak. Etterforskinga er på det nærmaste etterforska, slik at saka kan sendast vidare til Hordaland Politidistrikt, seier politiførstebetjent Svein Fammestad ved Lindås og Meland lensmannskontor til Strilen. Fammestad seier at det er snakk om eit vanleg gardsbruk som etter det han veit blant anna driv mjølkeproduksjon.
Det den etterforska blant anna har vedgått, er å ha tukla med det elektriske anlegget i fjøsen for å få det til å ta fyr.
? Han lukkast ikkje med dette forsøket, som går tilbake til desember 2004, seier Fammestad, som gjer det klart at han ikkje vil gå ut med detaljar frå ei både spesiell og vanskeleg sak.
Fammestad opplyser likevel at saka også omfattar ein god del skadeverk dei siste to åra.
? Den etterforska har vedgått ein del av skuldingane. Han har også betalt bonden ei viss erstatning, men dette kjem ikkje opp mot det skadane har kosta. Det dreiar seg om fleire hundre tusen kroner, seier Fammestad.
Lensmannskontoret vil koma med ei bevismessig vurdering av saka. Deretter vert det opp til politidistriktet sin jurist å vurdera den strafferettslege sida og kva tiltale det er aktuelt å ta ut.
Etter det Strilen kjenner til, har skadeverket ført til at den fortvila bonden vurderer å leggja ned drifta.