Dyrkolbotn får erstatning

Erstatningssummen frå staten i slike saker er symbolsk, og Dyrkolbotn vil ikkje ut med beløpet. Men han er glad for han på denne måten får slege fast at han har vore ulovleg overvaka, og får oppreisning for dette.

Overvaka for engasjement
Den tidlegare lokalpolitikaren for Senterpartiet og Venstre er likevel langt frå ferdig med saka.
? Det som gjer meg ekstra sint, er at eg veit om andre politikarar som har vore overvaka berre fordi dei har engasjert seg mot maktapparatet i stat og næringsliv, til dømes vore aktiv i kampen mot norsk medlemskap i EEC på 70-talet. Dette er og folk som ikkje har hatt noko med kommunistane å gjera, seier Dyrkolbotn
Han meiner det er ille at kommunistane vart ulovleg overvaka. Men denne ulovlege verksemda til POT ser ut til å ha gått mykje lenger enn dette. Det ser ut til at det var nok at ein engasjerte seg på ein måte som maktapparatet ikkje likte, meiner han.

Siste ord ikkje sagt
Grunnen til at Dyrkolbotn kom inn i POT sine register, var at Dyrkolbotn leirskule i 1975 vart leigd ut til ei gruppe tilknytt AKP.
Men i «mappa» til Dyrkolbotn hjå POT var det og registrert opplysningar heilt tilbake frå 1971. Han fortel at dei mellom anna hadde skrive at han som pedagogikklærar på Bergen Lærerhøgskole i 1971 var rekna som svært radikal.
I følgje POT sitt dokument var dette var den einaste grunnen til at han ikkje fekk fornya engasjementet sitt, trass i at han var ein flink lærar.
Det er og registrert at han engasjerte seg aktivt mot deler av Mongstad-utbygginga. Dyrkolbotn meiner at dette er svært alvorleg.
? Ein ville altså ikkje ha innanrikspolitisk engasjement dersom dette retta seg mot interessene til maktapparatet i landet, seier Dyrkolbotn.
Dette vil han sjå nærare på. Siste ord er difor ikkje sagt i denne saka, lovar han.