EBML satsar norsk til EM

EBML har leigd inn dirigent Bjørn Sagstad frå Meland til å leia korpset under EM i Belfast 28. og 29. april. Sagstad, som no er busett i Trondheim, er ein godt etablert dirigent, med oppdrag både i Noreg og i utlandet.

Lokal «pakke»
I tillegg har dei valt radøykomponisten Torstein Aagaard-Nilsen sitt verk «Riffs and Interludes», som sitt sjølvvalde stykke til konkurransen. På den måten er ikkje dette berre ei norsk satsing, men både dirigent og komponist kjem frå Nordhordland.
Nestleiar i EBML, Christian Lura, seier at dette var litt tilfeldig, men at dei er glade for å kunna stilla med ein slik lokal «pakke» til konkurransen.
? Dirigenten kjem gjerne med forslag til kva han ønskjer at korpset skal spela. Og så drøftar me dette, fortel Lura.
I dette tilfellet var det ikkje stor usemje mellom dirigent og korps om val av sjølvvald stykke. Lura meiner at dette er eit spennande val, og at musikken vil skilja seg ut frå mykje av det andre som vert spelt.
«Riffs and Interludes» vert av enkelte rekna som noko av det beste som er skrive for brassband, og var også pliktnummer i NM i 2005.

Målet er å vinna
EBML hadde øvingshelg søndag og måndag. Dei jobba då godt med både sjølvvald stykke og pliktnummeret. Dert siste verket heiter «Seascape with high Cliffs», og er skrive av den nord-irske komponisten Ian Wilson.
? Det har vorte ein tradisjon at arrangørlandet av EM engasjerer ein komponist frå landet til å skriva pliktnummeret, fortel Lura. Målsetjinga til EBML er å vinna EM.
? Me deltek aldri i ein konkurranse utan å ha som mål å vinna, seier Lura. Han meiner at EBML aldri har vore betre, men samstundes meiner han at EM i år vert tøffare enn nokon gong tidlegare. Det er den andre nestleiaren i korpset, Viggo Bjørge, heilt samd i.
? Medrekna oss er det heile seks korps som er gode nok til å vinna. Slik trur eg aldri det har vore før, seier Bjørge.
Han trur at Black Dyke Band må reknast som den store favoritten. Men også engelske YBS Band er svært gode. YBS har vunne åtte av dei ni EM dei har delteke i. Andre gode korps i EM i år er Leyland Band frå England, Cory Band frå Wales og belgiske Brass Band Willebroek.
? Den som skal vinna EM må ha ein god dag, og i tillegg verta føretrekt av dommarane, seier Lura.