Eikanger vann km-thriller

Berre fire minuttar av finalekampen på Stemmemyren var spelt, før ballen låg i nettet for første gong. Fjell-Kameratene sette inn 1-0. Knappe tre minuttar seinare bles dommaren av for straffe til det leiande laget. Kveldens første straffe enda med stang ut, og Eikanger var framleis med i kampen. Begge lag hadde fleire målsjansar i løpet av første omgang, men ved pause var Fjell-Kameratene føre 2-0 etter ei ny scoring etter ein halvtimes spel.

Reduseringar
I andre omgang kom Eikanger tilbake. Etter berre fem minuttar reduserte Ørjan Ånensen, og Harald Marthinussen la på til 2-2 eit kvarter før slutt. Dermed var det klart for ekstraomgangar på Stemmemyren. Slitne spelarar på begge lag gav alt den neste halvtimen. I første ekstraomgang la Eikanger på til 2-3 ved Kjell Øyvind Nævdal, og til 2-4 ved Ørjan Andvik. Men Fjell-Kameratene gav ikkje opp, og dei av Eikangerspelarane som hadde tatt sigeren på forskot, måtte bita i det sure eplet då Fjell-Kameratene scora to kjappe på fem minuttar i andre ekstraomgang.

Straffespark
Den spennande og allereie målrike kampen måtte avgjerast med straffespark.
Etter at Richard Toft, Ørjan Ånensen, Stian Stall og Daniel Toft sette inn sine straffespark, og Fjell-Kameratene bomma på to av tre, var det avgjort. Eikanger vart kretsmeistrar i sjettedivisjon.
Laget var nær ved å ikkje koma til KM-finalen, etter at dei tapte semifinalen 4-3 heime mot Austevoll. Men etter kampen vart det klart at Austevoll hadde brukt for mange spelarar som høyrde til 3. divisjonslaget, og fotballkretsen avgjorde at Eikanger likevel skulle stå som vinnar av kampen.

Laget
Dei 11 som starta kampen for Eikanger var: Keeper Kristian Kvammen, forsvararar Christoffer Knutsen, Stian Stall, Bjørn Dyrkolbotn og Bjørn Eide, midtbanespelarar: Ørjan Andvik, Richard Toft, Ruben Hosøy og Harald Marthinussen, Framme spelte Henning Gjelsvik og Ørjan Ånensen.
Innbyttarar: Daniel Toft, Stian Hauge, Kjell Øyvind Nævdal og Robert Andvik.