Eitt Eitt års permisjon med løn for Haug

Det vart like før nyttår kjent at Haug gjekk av som rådmann i Radøy kommune med umiddelbar verknad. Årsaka til dette var i følgje Haug usemje om vidare vegval for kommunen, og manglande handlingsrom og rammeføresegner som han meinte det var trong for i den vidare utviklinga av kommunen.

Frigav avtalen
I går vart avtalen mellom Radøy kommune og Haug frigjeven. I denne går det fram at Haug får permisjon med full løn, årleg tilleggsgodtgjering og pensjonsopptening, og at han beheld mobiltelefon og bærbar pc. Løna i permisjonstida vert justert lik ny rådmann si løn dersom denne er høgare. Avtalen inneber at alle tilhøve av arbeidsmessig og økonomisk karakter opphører. I tillegg er det med eit punkt om at partane ikkje skal omtala kvarandre på ein negativ eller uhensiktsmessig måte verken i det offentlege eller private rom. Avtalen vart underskriven alt 17. november i fjor, og godkjent av kommunestyret på møte 1. desember.

Etterlyst
Strilen har ved fleire høve bede om å få vita om Haug hadde fått sluttpakke og eventuelt storleiken på denne, då dette i så fall er snakk om kostnader for kommunen. Kommunen ville då ikkje svara på dette. Også Bergensavisen bad om avtalen, men fekk same svar som Strilen. Dei klaga då på dette, og formannskapet valde difor å frigje avtalen, opplyser ordførar Olav Steinar Namtvedt. Kommunen hadde undersøkt kva praksis Fylkesmannen har i denne typen saker, og funne at det vanlege er at avtalane vert kravd offentleggjort. Dei valde difor å frigje avtalen før saka gjekk til Fylkesmannen.