Eivind Reiten til Frekhaug

? Me er utruleg stolte og audmjuke av å få besøk av ein slik person, seier president i Nordhordland Rotaryklubb, Asle Hindenes, som inviterer alle som vil til føredraget.
Som konsernsjef i Hydro, er Reiten ein av dei mest sentrale bedriftsleiarane i landet.

Ein tradisjon
Hindenes seier det vanlegvis er veldig vanskeleg å koma i kontakt med Reiten, men at Nordhordland Rotaryklubb har eit medlem som er søskenbarn med Hydro-sjefen. Det er den vegen dei har gått for å få Reiten til Nordhordland.
Nordhordland Rotaryklubb har gjort det til ein tradisjon å ein gong i året invitera alle til eit stort temamøte, fortel Hindenes. Dei hadde besøk av Ole Danbolt Mjøs frå Nobelkomiteen for to år sidan, og han snakka om fred og forsoning. I fjor var det Ole Paus og biskop Ole D. Hagesæter som var trekkplastera. I år vert det altså ein næringslivstopp som kjem.

Samfunnsengasjement
Hindenes kjenner berre tittelen på føredraget til Reiten; «ei verd i endring», og veit ikkje nøyaktig kva Reiten kjem til å fokusera på. Men sidan det er snakk om ein næringslivstopp, er det ikkje usannsynleg at føredragshaldaren kjem inn på internasjonalisering.
? Kvifor lagar de denne typen arrangement?
? Rotary er ein humanitær organisasjon, og me driv innsamling av pengar til ei rekke hjelpeprosjekt. Men me tek og opp ei rekke samfunnsaktuelle tema til drøfting. Å halda seg oppdatert og visa samfunnsengasjement er ein del av det å vera rotaryanar, seier Hindenes.
Å delta på føredraget med Reiten kostar 100 kroner. Hindenes seier dei ikkje har store utgifter med dette arrangementet, slik at dei håpar arrangementet skal gje eit bra overskot til den lokale klubben sitt engasjement ved ein barneheim i Uganda.