Ekstremver på Hjelmås

Onsdag kveld litt før klokka åtte fekk Hjelmås sin versjon av ekstremveret som har herja ulike stader i Sør-Noreg dei siste vekene.
Så vidt Strilen kjenner til, gjorde ikkje haglskuren særleg skade. Men Nina Hauge har aldri opplevd noko liknande.
? Me hadde vore i besøk i Ikenberget og skulle ein tur til Molvik, fortel Hauge.
I Ikenberget skein sola, men dei såg det var skyer lenger inne.
? Då me kom til Leiknes, begynte det å regna, og då me kom ut av tunnelen på Hjelmås, var det som å møta ein vegg. Slik heldt det fram til me kom til Eikangervåg, seier Hauge.
Det samla seg raskt hagl og vatn i vegbana, og ein måtte setja ned farten på bilane kraftig.
? Hagla var på storleik med erter, fortel Hauge.
Etter Eikanger slutta haglet, men regnet heldt fram til dei kom til Ostereidet.
I Molvik hadde det nesten ikkje regna.
Nina Hauge, som bur på Kløve i Lindås, hadde klesvask ute og tenkte straks på den, men då dei kom heim ei stund seinare, var kleda nesten tørre.
? Det er tydeleg at byga var veldig lokal, men det var litt skremmande medan det varde, seier Nina Hauge.