Emil André nøgd med finaleplass

Erstad hevda seg dermed godt mellom mykje eldre konkurrentar, 14-åringen frå Radøy konkurrerte i klassen junior nitten. Erstad kan springa fire år til i same klasse, og held han fram med den gode utviklinga kan det koma betre plasseringar i dei komande NM-konkurransane.
Før helga sa Erstad at han ville gje alt for ein plass i finalen, og det gjekk akkurat.
? 250 meter før mål i forsøket såg det håplaust ut. Då hadde eg gitt opp håpet om å nå finalen. Eg klarte på ein meisterleg måte å ta ut alt i innspurten, og eg veit ikkje heilt kor mange løparar eg passerte den siste halve runden, sa Emil etter 1.59,04 i forsøket laurdag.
I finalen søndag gjekk det to hundredel raskare.

UM er viktigast
Erstad gjorde sensasjonelt sterke 1,57,86 då han vann Värdsungdomspelen i Gøteborg for knappe to veker sida. Dette er klar norsk årsbeste for 15-åringar.
? I helga sprang eg mot utøvarar til og med 19 år. Så mitt store mål var å koma til finalen. Noko meir hadde eg ikkje ambisjonar om, seier han.
Det er fleire gode løparar i Emil si klasse. AKS-guten har så langt stort sett vore den beste. I UM (NM for yngre) spring han berre mot jamaldrande.
? Det er sesongens viktigaste konkurranse for meg, understrekar han ein knapp månad før meisterskapen i Byrkjelo.
Erstad slo gjennom då han vann dei regionale ungdomsleikane i Haugesund i fjor haust.
? I fjor hadde eg 2.05 som personleg rekord, og kanskje kan det og vera sjansar for å springa tida mi ytterlegare litt meir ned,  avsluttar han.

Pers i motvind
Heidi Ann Bruknapp (15) var svært nær å gå til semifinalen både på 100 og 200 meter.
? Det blåste motvind begge dagar, beklaga AKS-jenta. Ho sprang 100 meter på 13,18 (pers 12,77), og 200 meter på 26,88 (pers 26,54).
? Eg var svært nær å koma til semifinale begge dagar. Det blåste 3,5 sekund meter mot på 100 meter, så tida var eigentleg omtrent på pers om eg hadde hatt same vinden i ryggen, seier ho etter sitt første junior-NM.
På 100 meter var det berre målfoto som skilte Heidi Ann frå å gå vidare.
? Hadde eg komme til ein semifinale ville det vore veldig bra, seier krinsens beste sprintar i denne årsklassa.
Bruknapp og dei andre i 15-årklassen som hadde klart å kvalifisera seg til junior-NM fekk kvar si klokke som inspirasjonsgåve.