Endeleg nei til terrengkøyring

Det er Fylkesmannen i Sogn og Fjordane som no stoppar planane for godt. Vedtaket er endeleg og kan ikkje klagast inn til nokon annan instans.

Jeep Club Norway si hordalandsavdeling ønskjer å arrangera terrengkøyring med bil på og ved den nedlagte skytebana på Rossland. Saka har vorte handsama ei rekkje gonger i planutvalet i Meland kommune. Uvalet har vingla fram og tilbake mellom ja og nei, men sa til slutt ja til terrengkøyring. Dette likte ikkje Fylkesmannen i Hordaland, som frå før hadde sagt nei til planane. Difor vart saka klaga inn til Fylkesmannen i Sogn og Fjordane, som setjefylkesmann. Og setjefylkesmannen har no sagt endeleg nei. Bakgrunnen er at området ikkje er regulert til denne type føremål.

«Gjeldande arealdel (i kommuneplanen) er nyleg rullert og vart vedteken 03.11.04. Me finn det såleis svært lite heldig mot den planprosessen som har vore å dispensera frå ein så nyleg vedteken plan», skriv Fylkesmannen i eit brev til Meland kommune.

Fylkesmannen legg vekt på at det skal mykje til for å gje dispensasjon frå ein kommuneplan, og at vilkåra slett ikkje er tilstades i dette tilfellet. Fylkesmannen i Hordaland har i tillegg lagt vekt på at det er tale om eit naturområde med spesielle verdiar. Mellom anna hekkar det ein truga fugleart i fjellsida over bana.