Eriksen kan få frådeling

Det var i byrjinga av juni at Gunnar Eriksen fekk administrativt avslag på frådeling av eit areal frå bruket sitt, og Strilen skreiv om saka i sommar. Arealet er tidlegare godkjent regulert som campingplass. Eriksen anka saka, og det er ankesaka som kjem opp i formannskapet 27. september. Her går altså rådmannen inn for å oppheva det tidlegare administrative avslaget.

Nye moment
Årsaka til at Eriksen ønskte frådeling, er at bankane gjerne krev dette for å kunna gje lån til prosjektet. Rådmannen viser til at det i anken har kome fram nye moment. Han skriv at det er viktig å få etablert ein campingplass i kommunen for å få oppfylt målet om satsing på reiseliv. Han viser og til at landbruksinteressene i området er små, og at ein gjennom reguleringsprosessen kom fram til at det aktuelle arealet ikkje har konsekvensar for sjølve drifta på bruket.
? Dei momenta som låg til grunn for avslaget, er vurderte til ikkje å vera så viktige at dei bør hindra ei utbygging av denne typen viktige tiltak for kommunen. Rådmannen finn difor på bakgrunn av opplysningar som kjem fram i klagen, å rå til at klagen vert imøtekomen og at det vert gjeve løyve til deling i samsvar med søknaden, skriv rådmannen i saksutgreiinga. Gunnar Eriksen seier han sjølvsagt er glad for at rådmannen går inn for å omgjera avslaget.
? Men eg vil sjå det formelle vedtaket i formannskapet før eg vil feira, seier Eriksen til Strilen i går.