Erstad vann i Gøteborg

Erstad har hatt ei formidabel utvikling denne sesongen og har forbetra persen sin frå 2.05 i fjor til 1.57.86 på stemnet på Nya Ullevi Stadion på laurdag. Det var god deltaking på stemnet, med fem-seks heat med ni deltakarar i kvart.
Erstad meiner at denne 800 meteren var nærmast perfekt for hans del. Han var svært nøgd med forholda, og hadde heller ingen problem med varmen, rundt 35 grader. Men han meiner sjølv at han har meir inne, og håpar han skal klara å koma ned på rundt 1.57.2 før sesongen er over. Han har trent godt i det siste, sju økter i veka. Neste store stemne vert junior-NM på Fana stadion i slutten av juli. Med gode forhold vil han der få ein sjanse til å forbetra persen sin enno ein gong.
Det var tre nordmenn først over målstreken i dette stemnet. Erstad slo Henrik Ingebrigtsen frå Sandnes i spurten. På tredje plass kom Henrik Gatemann, men han vart diska for å ha stige på streken i starten. Det er altså heile tre norske 15-åringar som hevdar seg godt på denne distansen. Erstad fortel at idrettsforbundet har sagt at det aldri før har vore eit så godt 15-årskull på 800 meter.
? Dette betyr at me får god konkurranse også på norske stemne, seier Erstad.
Sigeren i helga betyr mykje for motivasjonen til den svært lovande løparen, men Erstad reknar ikkje med at treningsdosane vert auka enno meir med det første. Det er det i så fall trenaren, Ola Jøsendal, som bestemmer.
Erstad sprang og 2000 meter på søndag. Her kom han på 5. plass med tida 5.57. Han er nøgd med tida, men ikkje med løpet.
? Dette var eit litt rotete løp. Dei første 200 metrane vart det nesten jogging. Deretter var det nokre som rykte frå feltet, men eg vart ikkje med fordi eg trudde eg ikkje klarte å følgja dei, seier Erstad.
Men han meiner han hadde litt for mykje krefter igjen på slutten av løpet, og kunne dermed fått ei endå betre tid. Men dette var første gongen han konkurrerte på denne distansen, og dermed kan det verta gode resultat også på 2.000 meter i framtida.