Etterlyser trygg veg

? Eg har ingen problem med å skriva under på at vegen er farleg. Sjølv har eg  vore involvert i to kollisjonar, seier Valdersnes.
Valdersnes er avhengig av vegen til og frå jobb i Bergen. Ho føler at ho kjenner vegen godt og er forsiktig.
Men det hindra ikkje at det small både i januar 2004 og i mai 2005.

Hadde flaks
? Første gongen fekk eg knekt brystbeinet. Siste gongen føler eg det var flaks at eg ikkje vart skadd. Eg stod nesten i ro, medan den som køyrde på meg hevdar han ikkje så meg, fortel Anita Valdersnes.
I det første uhellet var  det glatt, og saltebilen kom ikkje før etter kollisjonen. Familien sin bil vart kondemnert. Den andre gongen køyrde ho ein firmabil. Skadane kom på langt over 100.000 kroner.
Etter dei to kollisjonane vedgår Valdersnes at ho køyrer ekstra roleg forbi Litlebergen.
Vegen er ikkje berre smal, men har også svingar med liten sikt.
I tillegg til bil-kollisjonar, har det også skjedd ulukker der motorsyklistar har vore involvert. Den siste skjedde etter nyttår, med alvorleg skade som resultat.
? Nokre stader kan to bilar passera greitt i liten fart. Men er farten for høg, går det ikkje, påpeikar Valdersnes. Ho viser til at både nye byggjefelt og ny barnehage vil føra til stadig auke i trafikken.
Sjølv nektar ho eigne born å bruka sykkel på strekninga, i alle høve på kveldstid.

Også kommunen ønskjer å få gjort noko med den farlege fylkesvegen. Kravet er  tofeltsveg med gang- og sykkelveg heilt frå Fosse til Moldekleiv. Frå Espetveit til Ådland bør det koma standardheving.
Det er krav kommunen håpar vil slå gjennom i fylkesvegplanen 2006-2015, som er ute til høyring. I denne planen er ikkje Meland nemnd med eit ord. Men fylkesvegane der er «mest like dårlege som i dei andre kommunane», heiter det i saksutgreiinga.