Evakuert frå Beirut

Førre torsdag kunne Røde Kors melda at dei har vald å trekkja ut to delegatar frå Libanon. Ein av dei er Kenneth Skoge frå Austrheim. Han reiste til Beirut som ungdomsdelegat for Røde Kors i september, og planen var å vera i Libanon i ni månader. No er han evakuert på ubestemt tid grunna høgt spenningsnivå .

Skoge kjem frå Austrheim, har mastergrad i informasjonsteknologi, og er handplukka til arbeidet som ungdomsdelegat i Libanon. Kvart år sender Røde Kors seks personar mellom 21 og 28 år på ni månaders opphald i utlandet med arbeid som ungdomsdelegatar. Det er dei to delegatane frå Beirut som no er evakuerte.

Auka spenning

? Uttrekkinga hende i samband med at det var store demonstrasjonar i området. Ut frå det spenningsnivået som var, fann me det riktig å trekkje dei ut, seier kommunikasjonssjef i Røde Kors, Bernt G. Apeland til Strilen. Kommunikasjonssjefen vil ikkje seia nok om under kva omstende dei to delegatane vart trekte ut.

? Me vil at våre delegat skal halda ein lav profil no, og kan ikkje seia noko anna enn at dei er midlertidig trekt ut av Libanon, seier Apeland.

Utanriksdepartementet (UD) har tidlegare oppfordra alle nordmenn i Beirut om å halda seg innandørs, men har førebels ikkje sett det nødvendig å evakuera nordmenn frå Libanon. Fleire demonstrasjonar har vore med på å auka spenningsnivået i Libanon, mellom anna samla tusenvis av demonstrantar seg ved det danske generalkonsulatet i Beirut førre laurdag. Uttrekkinga av dei to Røde Kors-delegatane fann stad etter opptøya i Damaskus i Syria, der både den danske og den norske ambassaden vart sett i brann.

Ikkje direkte truga

Apeland karakteriserer Skoge sitt arbeide i området som organisasjonsutvikling, og seier at så lenge arbeidet ikkje er livsnødvendig arbeid, er terskelen låg for å trekkja ut folk.

? At våre ungdomsdelegatar i Libanon er trekt ut, er rett og slett ein generell sikkerheitsforanstaltning. Spenningsnivået i området har auka, seier Apeland.

Det har ikkje vore noko direkte truslar mot Røde Kors-utsendingar.

Røde Kors vurderer fortløpande om det er forsvarleg å senda Skoge tilbake til Beirut. Det er ikkje gjeve offisielt reiseråd mot å reisa til Libanon, men UD fråråder nordmenn frå å reisa til nabolandet Syria, og ber nordmenn som bur der om å reisa frå landet.