Fann 4000 år gammal pilspiss

? Dette var litt av ein lekkerbisken, sa dei på Arkeologisk Museum i Stavanger då dei fekk sjå pilspissen som Andreas Meinich-Backe fann ved Risnes for eit par veker sidan.
Det fortel mor til Andreas, May Sissel Fagervik, til Strilen.
Andreas var på besøk hos besteforeldra på Risnes i sommar. Då var han ute og bada i nærleiken, og då han snorkla i strandkanten på om lag ein meters djup, såg han noko som stakk opp av sanden. Då han såg nærare på det, såg det veldig ut som ein pilspiss av stein.

På museum
Sidan Andreas bur i Stavanger, tok han steinen med seg dit og gjekk på Arkeologisk Museum der for å la fagfolk fastslå om han verkeleg hadde gjort eit spennande funn, og det hadde han.
? På museet sa dei at pilspissen var minst 4000 år gammal, og at det var eit veldig fint eksemplar, fortel mora.
Pilspissen er laga av skifterstein.

Til Bergen
Sidan pilspissen vart funnen i Hordaland, er han no oversend til Kulturhistoriske samlinger ved Bergen Museum.
? Pilspissar frå denne perioden, yngre steinalder, er ikkje så uvanlege, men dei er alltid interessante fordi dei viser at her har vore ein steinalderbusetnad i nærleiken, fortel forskar Søren Diinhoff ved Bergen Museum til Strilen.
Etter det han kjenner til, skal det ikkje vera gjort så mange slike funn i denne delen av fylket.
Dermed har kanskje ein vaken, unge mann frå Stavanger gjort sitt til å skaffa fram ny kunnskap om korleis det var i Masfjorden i steinalderen.