Fann ammunisjon ved barnehage

Det var rektor Rolf Sandstad ved Sæbø skule som kom over dette under ei befaring utanfor skule- og barnehageområdet. Han kontakta så Radøy lensmannskontor.
? Dette stammar frå eit straffbart forhold langt tilbake i tid. Denne saka er oppklart, og dei skuldige er dømde for rundt eit år sidan. Men ammunisjonen har altså ikkje kome tilrette før no, seier lensmann Kjell Idar Vangberg.

Tenåringar
Dei dømde var i tenåra då tjuveriet vart gjort. Dei fekk litt ulike dommar. Ammunisjonen politiet no har teke hand om skal leverast tilbake til eigaren.
I følgje Vangberg er det ikkje snakk om militær ammunisjon, men vanlege skot. Han meiner og at dette ikkje har medført noko stor fare, så lenge det ikkje har vore våpen med i biletet. Han kan ikkje seia noko om kor lenge desse skota kan ha lege i nærleiken av skuleområdet.

Låg i kasse
Rolf Sandstad fortel at ammunisjonen låg i ein kasse og ein pose like nedanfor barnehagen. Det kunne kanskje sjå ut som om det har lege der ei stund.
? Vart du litt sjokkert over funnet?
? Ikkje akkurat det. Men det er klart at dette skal oppbevarast på forsvarleg måte, og slik det låg var det jo ikkje det. Eg tok det difor med meg og kontakta lensmannskontoret som seinare kom og henta det, seier Sandstad.
? Under visse forutsetningar kan det vera farleg dersom born får tak i ammunisjon og leikar med dette, seier Alf Øversveen, major i Forsvarets Logistikk Organisasjon, Ammunisjon.
Han fortel at det er mange born som har skadd seg etter leik med ammunisjon. Særleg var det mykje av dette i Finnmark like etter krigen, då det låg igjen svært mykje ammunisjon rundt omkring.