Fann dumpa bilar

? Me fann og tok opp fem delar. Dei stammar frå to ulike bilar, seier politibetjent Christian Hilland.
Ein mann vart førre veke varetektsfengsla i to veker, mistenkt for bildumping. Politiet meiner han har motteke bilane frå eigarar som så har meld dei stolne. Mannen har så ribba dei for verdifulle delar og dumpa dei i sjøen. Fredag leita betjentar frå Lindås og Meland lensmannskontor i Austfjorden. Og med miniubåt fann dei i løpet av kort tid nokre store karosseridelar.
? Desse låg på mellom femti og hundre meters djup, seier Hilland.
Delane vert no sende til Biltilsynet, som skal prøva å finna ut kva bilar dei stammar frå. Politiet håpar at det let seg gjera å finna chassisnummera, men fryktar at desse kan vera fjerna.
Det er minst tretti meter loddrett ned frå vegen til staden bilane vart funne. Det er ikkje merker på støypekanten, bilane må såleis ha funne vegen utfor kanten på andre måtar enn ved å verta dytta. Christian Hilland seier at det neppe ligg fleire bilar i området der dei leita i dag. Men politiet utelukkar ikkje at det kan verta leita andre stader.
Mannen som er sikta for bildumpinga, vart pågripen tysdag i førre veke. Då beslagla politiet ein BMW dei trur mannen skulle demontera. Mannen har ikkje erkjent straffskuld.