Fann levande hoggorm 30. november

Ormen kraup like ved trappa til huset der dei bur.
? Thomas held på å trakka på han, seier Marius, som skvatt skikkeleg til då han kom heim frå skulen i to-tida om ettermiddagen torsdag.

Rulla seg saman
Ormen kveste og rulla seg saman klar til å forsvara seg. Ein av gutane sprang inn til mora Grethe, som ikkje skjøna kva dei meinte når dei sa at det låg «ein slange» utanfor huset. Kven hadde vel tippa at det handla om ein hoggorm, når årstida seier vinter og datoen 30. november.
Det skal ha vore ein del orm i år, men familien Frotjold har berre sett ein einaste hoggorm i sommar. At dei då skulle få sjå ein til no på vinteren, er det ingen som hadde drøymt om ein gong.

To gongar
Berre to gongar tidlegare sidan 1953 er det meldt om orm så seint på året i Hordaland, fortel konservator Ingvar Byrkjedal ved Bergen Museum.
Den ormeobservasjonen som er registrert seinast på året ved Bergen Museum er frå  17. desember 1990 i Austrheim, fortel konservatoren. Det var også ein observasjon på Flesland i 1953 30. november.
? 8. november i 1983 vart det dessutan oppdaga ei hoggormho som var i ferd med å føda ungar. Den vart sett på Flyplassen på Flesland, seier Byrkjedal, som legg til at alle desse tilfella er veldig uvanlege.

I dvale
Hoggormen går stort sett i dvale mellom litt ut i september til midten av mars. Dei går i dvale når temperaturen kryp med mot åtte-ni varmegrader. På våren kjem dei først ut av bolet og byter skinn. Deretter startar paringa. Hoene går drektige til midt på sommaren, og i den tida verken et dei eller gjer noko særleg. Året etter at hoene har fått ungar, tek dei seg eit friår og parar seg ikkje. Dei får altså ungar annakvart år, fortel Byrkjedal. Hannane derimot er aktive og jaktar heile sommarhalvåret.
Byrkjedal meiner det kan vera fleire årsaker til at hoggormen på Brattetaule tok seg ut av bolet. Ormane rører gjerne litt på seg i løpet av vinteren, for å finna mest mogleg optimale forhold med omsyn til varme og fuktigheit. Konservatoren ser ikkje vekk frå at det kan ha kome vatn i bolet til denne ormen i det forferdelege regnveret den siste tida, og at han difor var på leit etter ein ny stad å leggja seg til for vinteren.