Fann stolen postbil

Tre menn tvang til seg bilen frå ein postmann medan han delte ut post ved eit stativ ved Hestnes. Store politistyrkar frå Nordhordland og Hordaland politikammer var i går ettermiddag på jakt etter dei tre mennene.
Bilen vart funnen litt før klokka 18 på Frekhaug. Postmannen, som var uskada, melde sjølv frå om tjuveriet, opplyser operasjonsleiar Asbjørn Andersen ved Hordaland Politidistrikt.

Orange regntøy
Andersen seier den eine mannen var kledd i orange regntøy. Utover det har dei lite opplysingar om gjerningsmennene. Han kunne då ikkje seia noko om kva tjuvane hadde stole, men dette vil koma fram i etterforskinga av saka.
? Det var store styrkar involvert i leiteaksjonen, også politifolk frå Hordaland Politidistrikt, seier operasjonsleiaren.
Det var altså stor aktivitet med politibilar på vegane etter tjuveriet, og desse leitte etter gjerningsmennene og den stolne postbilen. Politiet fekk melding om tjuveriet klokka 14.23.
Postbilen som vart stolen var ein Renault Kangoo merka med Posten sin logo.

Brev og pakkar
? Postmannen er uskada, men sjølvsagt prega av hendinga, seier informasjonssjef Edvin Rossen i Posten.
Han fortel at postmannen vert teken godt hand om av leiinga og av bedriftshelsetenesta.
Rossen har arbeidd i Posten i 12 år, og har berre ein gong tidlegare høyrd om tjuveri av ein postbil. Det skjedde ein stad på Austlandet. Men den gongen var det snakk om ein bil som stod parkert, ikkje at postbilen vart stolen frå ein postmann medan han delte ut post ved bilen. Rossen kjenner ikkje til om det var store verdiar i bilen, men seier at bilane til landpostbod i all hovudsak inneheld brev og pakkar.