Fann verdas lengste løvetann

I Guinness rekordbok frå 2005, såg Bjørn Magne at rekorden frå 2003 ikkje var slått. Den rekorden var ein løvetann som var 100 cm lang, og vart funnen i Uppsala i Sverige av Ragnar Gille og Marcus Hamning. Bjørn Magne og kameraten Henrik Fanebust tenkte dei skulle slå denne rekorden, og har leitt og leitt etter ein løvetann som er lengre.

Lukkast før helga
? På veg opp til Fløyen her på Kløve fann eg mange lange løvetannar, blant anna ein på 108 cm og ein på 102 cm, fortel Bjørn Magne.  Begge var altså lengre enn den som står i Guinness rekordbok. Mamma Nina Hauge sjekka i går opp med Schibsted, som er forlaget for den norske utgåva av rekordboka, og fekk vita at det ikkje har kome inn meldingar om lengre løvetannar enn ein meter. Dermed ligg Bjørn Magne an til å koma i den profilerte rekordboka, dersom rekorden vert godkjend.

Nye rekordar
For å få godkjend rekorden må lengda på løvetannen stadfestast av minst to uhilda personar. Strilen kunne med eigne auge slå fast at lengda på den eine løvetannen var på 108 cm ? inga tvil om det. Og det til og med utan blome. For den løvetannen Bjørn Magne fann var heilt utblomstra og frøa var også vekke. Rektor Turid S. Tvedt ved Kløvheim skule skal også stadfesta dette, då ein av personane som skal stadfesta rekordar må vera politimeister, rektor eller liknande. Bjørn Magne er interessert i mykje og likar godt å vera ute i skog og mark, fortel mamma Nina. No ligg det altså an til at han koma i Guinness rekordbok. Og mykje tyder og på at Bjørn Magne og kameraten Henrik i tida framover vil leita i boka etter nye rekordar dei kan slå.