Får aldri att førarkortet

Mannen, som er i tjueåra, får dermed aldri lov til å sjølv køyra bil eller motorsykkel att. Han vart tatt for å køyra motorsykkel i rusa tilstand i fjor haust. Etter ein lang køyretur kom han til Isdalstø. Der køyrde han nærast midt i vegbana.
Då han skulle manøvrera unna ein møtande bil, kvelva han. Motorsykkelen fekk mindre skader, medan mannen var uskadd. Politiet henta mannen for å ta blodprøve. Denne prøven viste at han hadde både hasj, amfetamin og beroligande tablettar innabords.
Mannen hevdar sjølv at han ikkje var rusa då han køyrde, men dette trudde ikkje retten på. Retten la til grunn at stoffa i blodet tilsvarte ein alkoholpromille på cirka 1,0. Dette skal i utgangspunktet gje bot og fengsel på vilkår. Men mannen er to gonger tidlegare straffa for å ha køyrd i rusa tilstand. Han er dessutan dømt tre gonger tidlegare for å ha køyrd utan førarkort.
Han hadde heller ikkje førarkort då han kvelva med motorsykkelen i Isdalstø. Difor dømte retten han til fengsel utan vilkår i 21 dagar. Han må dessutan betala 7000 kroner i bot, og får altså aldri førarkort att.