Får kritikk for brannvern

Det er eit fersk branntilsyn som avdekkar punkt etter punkt med brannvern-manglar ved rådhuset på Frekhaug. For tilbygget vart det rett og slett ikkje lagt fram nokon som helst dokumentasjon. Ved toppen av eit trapperom er det røykventilasjon. Her skal det føreliggja serviceavtale, men kommunen sine folk kunne ikkje leggja fram verken slik avtale eller logg for service på brannalarmanlegget.

Siste øving i 2000
Det er heller ikkje gjennomført brannøving og opplæring internt på bygget dei siste åra. Siste større øving var med røykvogn i 2000.
«Dersom det ikkje vert laga plan for øving og opplæring, og slik øving og opplæring vert gjennomført snarast, må brannsjefen vurdera pålegg for å få dette gjennomført, er dei klare orda i rappporten frå kontrollør Kjell Reigstad.

? Ikkje veldig alvorleg
Me ser ikkje på dette som veldig alvorleg, men det er litt alvorleg at dei ikkje har hatt brannøving på fem år, seier Reigstad til Strilen.
Han seier vidare at det ikkje er uvanleg at dei finn såpass mange manglar ved offentlege bygg. Men samstundes er det ekstra viktig at brannvernet er på plass ved rådhus, då det i tillegg til sikring av folk gjeld sikring av store verdiar ? til dømes arkiv og liknande.
Ei av årsakene til at det har vore ein del å påpeika i kontrollen, er og at det har kome nye reglar.
Det er litt opp til kvar bedrift om kor ofte dei bør gjennomføra brannøvingar. Reigstad meiner likevel ein i alle fall bør ha ei enkel brannøving minst ein gong i året.
Blant anna er det viktig at folk kjenner til kvar det finst sløkkingsutstyr og kvar rømmingsvegane er.

Fleire manglar
Ved konrollen i Meland kunne kommunen heller ikkje leggja fram ferdigattest og bruksløyve for den nye delen av rådhuset.
Ferdigattest og bruksløyve vert huseigaren beden om å få på plass snarast.
Og ikkje nok med det: Det manglar også brannvernteikning og brannverndokumentasjon for nybygget. System for utføring av kontroll, ettersyn og vedlikehald er ikkje tilfredstillande.
Brannvernet ber om snarleg oppretting av serviceavtalar og forlangar kopi av desse.
Også når det gjeld Helse, Miljø, Sikkerhet (HMS) og internkontroll, vert det påvist feil. Blant anna manglar dei ei systematisk overvaking av brannvernarbeidet for å sikra at dette fungerer.
Lista etter kontrollen inneheld heile åtte avvik.

Lovar betring
Strilen tok kontakt med assisterande rådmann Kari Johanne Iversen, då rådmann og teknisk sjef/brannsjef er på ferie. Iversen har ikkje vore direkte involvert i saka, men seier dei er i gang med å følgja opp det som er påpeika etter branntilsynet.
? Synst du det er pinleg å få så mange avvik?
? Nei, men der er ein del ting me skal ordna opp i, lovar Iversen. Ho seier og at dei har hatt ei øving på sløkkjing i vår for fem medarbeidarar som ikkje deltok i 2000. Men dei har ikkje øvd på rømming av bygget dei siste åra, noko dei vil ta tak i.