Feiar piper i fire kommunar

? Eg har vorte veldig godt motteken både på Mjømna og i Modalen, der er starta jobben min, seier Torbjørn Jenset (53) til Strilen.

For 14 dagar sidan kom Jenset flyttande frå Molde med kona si. Dei busette seg i rorbu på Mjømna, og no er han i full sving med å sjå til at skorsteinar og anna som har med fyringa å gjera, er i forskrittsmessig stand.

? Etter kvart som folk får seg skikkelege omnar, er det ikkje så mykje sot i pipene som før. No går like mykje av arbeidet mitt ut på å driva førebyggjande brannvern rundt i heimane, seier Jenset.

Gått saman

Kommunane har til dels hatt problem med å skaffa seg feiarar, og i år vart kommunane Solund, Gulen, Masfjorden og Modalen samde om å slå feiartenesta saman og tilsetja ein feiar på fellesen. Utgiftene vert fordelte på kommunane etter folketal.

Midt i oktober begynte Torbjørn Jenset i den utlyste jobben. Han har fagbrev som feiar og har jobba i det yrket dei siste seks åra, men før det var han tømrar.

Båtentusiast

? I Molde og omegn fekk eg berre vikariat og deltidsjobbar, så då eg såg denne jobben utlyst, søkte eg, fortel Jenset.

Han er ivrig båtentusiast og har ein seglbåt på 28 fot. Difor er rorbu på Mjømna midt i blinken.

Kona er hjelpepleiar og har fått seg jobb på sjukeheimen i Eivindvik. Borna er vaksne og bur rundt i landet.

Prata med folk

Ein feiar er ikkje berre oppe på taka hos folk for å feia pipene. Han møter mykje folk gjennom jobben, og det trivst Jenset godt med.

? Eg likar å prata med folk, seier han.

I førre veke deltok han også på eit kurs i rehabilitering av gamle piper i Knarvik i regi av Lindås og Meland brannvern.

No er det husa i Solund som står for tur, før husstandane i Gulen og Masfjorden får besøk.

Kommunane har leasa ein varebil som feiaren nyttar i tenesta.