Fekk Kong Olav Vs kreftforskingspris

? No skal det bli godt med ein månad ferie på Fjellanger, seier den 48 år gamle professoren, som er oppvaksen i Gjøvik, men ikkje veit nokon betre plass å feriera enn på Lindås.
? Der har eg feriert kvar einaste sommar så lenge eg kan hugsa, og der stikk heile familien innom, seier ho. Og familie på Lindås har ho mykje av. Mora Ruth kjem frå Fjellanger, faren Bjørn kjem frå Lindås og besteforeldra var Ludvig og Gudrun. I tillegg har ho ei søster og onklar og tanter i fleng der ute, fortel ho.

Viktig påskjøning
Prisen fekk Lothe tildelt av sjølvaste Kong Harald under ei tilstelling på Universitetet i Oslo torsdag. Men det er ikkje berre av den grunn ho er stolt.
? Prisen betyr mykje fordi Kongen har gitt namnet sitt til prisen, men det som betyr mest er pengane som gjev oss sjansen til å koma endå lenger i forskinga, seier ho.
Lothe er leiar for Avdeling for kreftførebygging ved Institutt for kreftforsking, Rikshospitalet-Radiumhospitalet. I tillegg er ho professor II ved Universitetet i Oslo og nestleiar i Senter for kreft-biomedisin.

Tjukktarmkreft
Forsking har ho halde på med heilt sidan 1985.
? Eg har alltid visst at det var kreftforsking eg ville driva med, for også i vår familie har me opplevd kreft på nært hald, seier ho.  
Lothe fortel at kreftforma dei forskar mest på er den som er vanlegast i dag når ein ser vekk frå kjønn, nemleg tjukktarmkreft. Denne kreftforma råkar heile 3500 nye personar kvart år, og halvparten av desse døyr i dag før det har gått fem år.

Lovande funn
Med funnet som Lothe og dei tretti medarbeidarane hennar har gjort, er håpet å oppdaga kreften mykje tidlegare. Det dei har funne fram til, er nemleg ein enklare og sikrare måte å testa avføringsprøvar på.
? Ved å gjera det enklare å oppdaga kreften tidlegare, aukar sjansen for å overleva, seier ho. Ho fortel at dataene er svært lovande og at forskningsprisen vil gå til det vidare arbeidet med testar for tjukktarmskreft.