Fekk pris for bok om skarpe tenner

? Det er sjølvsagt ei fjør i hatten å få denne prisen, og det som gjer det ekstra kjekt, er at det truleg fører til at boka får fleire lesarar: Eg trur det er ein pris som vert lagd merke til, særleg i skuleverket, seier Erna Osland til Strilen før ho tek turen til Oslo for å motta prisen.
Denne og fleire andre prisar for barne og ungdomslitteratur utgjeven i 2005 vart delte ut i Nasjonalbiblioteket i Oslo under ein seremoni fredag. Kulturminister Trond Giske stod sjølv for utdelinga.
I tillegg til heideren får Osland 45.000 kroner.

Spennande
? Eg tykkjer tenner er så fascinerande, og så er dei så ulike frå skapning til skapning, seier Osland, som også tidlegare har skrive fagbok for born, då om hår.
«Skarpe tenner» handlar om tennene til både dyr, fiskar og krypdyr og korleis dei er tilpassa levesettet til dyra.
? Visste du at paddene ikkje kan tyggja, men må sluka det dei et, heilt, eller at kjeven til krokodillene ikkje går opp og ned som vår? spør Osland.
Dette er ting du kan få greie på ved å lesa boka hennar.
Boka inneheld ikkje berre tekst, men illustrasjonar og. Dei er laga av Marvin Halleraker, som er avisteiknar i Bergens Tidende. Han får også pris for teikningane sine.
? Teikningane hans er så flotte. Dei går ikkje ut på å visa tennene nett slik dei er, men funksjonen dei har. Du skulle sjå haikjeften han har teikna. Den er skremmande, kulsar Osland.

For vaksne og
Om boka er laga for born, kanskje mest på mellomsteget, kan boka også fint lesast av vaksne, meiner Osland.
? Kanskje kan born og vaksne lesa henne saman, meiner ho.
Ho trur også vaksne vil finna opplysingar i boka som dei ikkje visste frå før.
? Og så er boka på nynorsk. Det finst ikkje mange fagbøker for born på nynorsk diverre, seier Osland.
Boka er utgjeven på det vesle bergensforlaget Mangschou.