Fekk toppkarakterer

? Det er svært sjeldan at me ser slike resultat. Dei er flotte representantar for skulen, seier Helge Brekke, avtroppande rektor ved Knarvik ungdomsskule.
Han er svært stolt av dei to elevane ved skulen som har klart å fortena så mange toppkarakterer.
Det er mulig å få 15 seksarar på vitnemålet frå ungdomsskulen.

Engasjerande lærar
? Eg hugsar ikkje kor mange seksarar eg har. Det er ikkje det viktigaste for meg, seier June Hosøy Andersen beskjedent.
Men vitnemålet kan ikkje feiltolkast, og viser tydeleg 12 seksarar. I kunst og handtverk, gym og på matteeksamen fekk ho femmarar. Ho veit ikkje heilt kva som gjer at ho har gått ut med toppkarakterer.
? Eg likar skulen, og då vert det berre slik, seier ho, og legg til at ho nok også alltid har vore flink å hugsa ting raskt.
? Eg trur eg har vore heldig, og har nokså fotografisk hukommelse, seier Stephen Kålås.
Enkelte lærarar vert og trekt fram som viktige for dei gode resultata. Stephen vil spesielt nemna Astrid Sirnes som lenge  hadde han i naturfag og matte.
? Ho underviser på ein måte som engasjerer alle i klassen, seier han.

Veddemål
Men du må ikkje tru at verken June eller Stephen har stengt seg inne med skulebøkene gjennom tre år på ungdomsskulen. Dei likar begge å bruka fritida til andre aktivitetar. June er med i speidaren, og Stephen spelar mykje fotball.
? Eg gjer minimalt med lekser, seier Stephen Kålås og kikkar ned på karakterutskrifta.
Den viser 13 seksarar og to femmarar.
? Eg fekk femmar i norsk sidemål, som var bokmål, og på skriftleg eksamen i engelsk, seier han.
Med 13 seksarar har han med god margin vunne eit veddemål han gjorde med far sin.
? Me vedda om eg kom til å klara 80 prosent seksarar. Men om eg får den bilen me snakka om, er heller usikkert, seier Stephen og smiler.
Sekstenåringane har ikkje planar om å ramma inn vitnemåla på veggen heime, og dei  reknar heller med at dei kjem til å støva vekk i ein konvolutt ein stad. Men kunnskapen tar dei med seg vidare.
Stephen har søkt seg inn på elektrolinja ved TAFF, og ser for seg ei karriere som ingeniør. June har bestemt seg for å verta lærar.
? På høgare nivå, ikkje på barne- og ungdomsskulen, seier ho skråsikkert.
Dei flinke elevane trur nivået no vert høgare, men vert ikkje skremde av det.
? Eg håpar verkeleg det vert vanskelegare. Norsk på ungdomsskulen var alt for lett, seier ho og smiler.