Fekk våpen mot hovudet på fest

? Me fekk melding om at nokon hadde fått sikta eit våpen mot hovudet. Det var ikkje sikkert kva våpen det var, og me rykka ut, seier politiførstebetjent Terje Hilland ved Lindås og Meland lensmannskontor. Ein skuleklasse frå Nordhordland Vidaregåande skule hadde fest natt til torsdag, men utover kvelden fekk dei besøk av fleire folk som ikkje høyrde til på festen.
? Det kom fleire som ikkje høyrd til på festen, og det utvikla seg bråk, seier Hilland.
I to-tida om natta fekk politiet beskjed om at eit våpen hadde vorte sikta mot festdeltakarar.
? Det var eit einhandsvåpen, og kunne lett tolkast til å vera eit skarpt våpen av folk i skumringa, seier Hilland.
Politiet fann etter kvart ut kven gjerningsmannen var, og mannen i byrjinga av 20-åra vart pågripen heime hjå seg sjølv på morgonkvisten.
? Det viste seg at våpenet som var blitt brukt var ein softgun, men den var svært identisk i utsjånad med ein skarp pistol, seier Hilland.
Gjerningsmannen er kjend av politiet etter ein del uoppgjorte hendingar den siste tida. Mellom anna dreiar det seg om vinningstjuveri og vald. Mannen vart framstilt for varetektsfengsling fredag.
Det har den siste tida vore meld om fleire tilfelle der tilfeldige har blitt sikta på med våpen. Seinast førre veke vart to menn sikta på med våpen frå ein bil på Lauvås.
Tidlegare i vår har det og vore tilfelle av sikting og bruk av softgun i Knarvik.
Politiførstebetjent Hilland påpeikar at slik bruk av leikevåpen er ulovleg.
? Det er straffbart å sikta, og absolutt ikkje lov. Det framkallar frykt, og den vanlege mann i gata ser ikkje forskjell på skarpt våpen og leikevåpen. Ein skal ikkje sikta, uansett om det er eit leikevåpen, seier han.