Felles rektorar ulovleg

Det er i ein lovlegkontroll Fylkesmannen si utdanningsavdeling har kome fram til denne avgjerda. Avgjerda gjeld skulane Leiknes/ Eikanger/Myking/Kløvheim samt Seim/ Skodvin/ Festo.
Opplæringsdirektør Kjellbjørg Lunde viser til at kontrollen er basert på krav frå skulemiljøutvalet og samarbeidsutvalet ved Myking skule.
Men Lunde seier også at utdanningsavdelinga og tok opp saka på eige initiativ etter at dei las i lokalpressa kva rådmannen ville gjennomføra.
Dermed har Lindås måtta tola den andre underkjenninga av vedtak på kort tid. Nyleg vart det klart at også vedtaket om å flytta Leiknes-elevar til Ostereidet ungdomskule, var ulovleg.

Støtta av politikarane
? Avgjerda om at rektor-ordninga er ugyldig kan ikkje ankast. Saka har vorte tilfredstillande opplyst frå administrasjonen i Lindås. Og eg trur ikkje avgjerda kjem overraskande på rådmannen, seier Lunde.
Lunde peikar på at politikarane har bede rådmannen gjennomføra ei omorganisering. Så har dei støtta endringane i ettertid. I november uttalte formannskapet at dei meinte omorganiseringa «vil vera til beste for innbyggjarane i Lindås kommune».
? Oftast tek me utgangspunkt i eit politisk vedtak når me gjer ein lovlegkontroll, men det har ikkje vore tilfelle her, seier Lunde.

«Fortruleg»
Det er omgrepet «fortruleg» i Opplæringslova Fylkesmannen viser til når Lindås sine endringar vert kjende ugyldige. Det vert lagt vekt på at ingen av skulane var fritekne for rektorkravet etter dei gamle reglane. «Og lovendringa i 2003 var ei skjerping og ikkje ei oppmjuking av rektorkravet». Felles rektor «er lov berre så langt det er mogleg for rektor å halda seg fortruleg med den daglege verksemda ved den enkelte skulen rektor leiar. Omgrepet fortruleg ligg til rektor og kan ikkje delegerast», skriv Fylkesmannen blant anna. Det vert også minna om lova sitt krav til skulefagleg kompetanse.

Liten sans
Fylkesmannen har liten sans for at rådmann Øistein Søvik vil ha ein leiarstil etter prinsippet «Management by walking around». I tillegg til einingsleiarane for kvar skulegruppe, skal kvar gruppe også ha ein assisterande einingsleiar. Begge skal etter opplegget vera mobile og gjer mykje av jobben via e-post og telefon. Det har som konsekvens at det er «lokale korordinatorar» som skal vera fast/dagleg til stades på kvar skule. Men Fylkesmannen godtek ikkje at dei berre skal kunna «avklara enklare daglegdagse spørsmål». Koordinatoren kan ikkje koma i staden for kravet om ein rekoror som er fortruleg med den daglege verksemda, meiner Fylkesmannen.